Няръяна Ӈэрм
Ӈэрмʼ терˮ илаʼ нямна
Ӈаниˮ ёˮ терˮ, ӈарка хардахаˮна иленаˮ ӈэрм янаˮ ненэциеˮ илʼ хурка ӈэвамʼ манэˮмадавэйдоʼ. Ӈадьбята Тюменьхана Илмʼ хэтыбавамʼ нюбета ялямʼ серта таславыˮ. Тарця хэбидя яля хорˮ ирыʼ юкад вата хасаваюдимдей яляхад носиндалаваʼ ирыʼ тетимдей яляʼ ӈэсондʼ минда.
Тикахана ӈэрм терˮ мысы, илаʼ саирмʼ, ханзерˮ илевамʼ манэˮлабтамбиˮ. «Увас мир Хот» нюбета ӈэсыхына нибтаравамʼ, сянакубц, тарабцо манэˮлабтамбавыˮ. Тад пуна сёхоˮ инзелевыˮ. Мядондидоʼ благотворительной экскурсияˮмана ядэлавыдоʼ.
Илебей ненэциеˮ маˮлюрмахана «Кедр» нюбета мэлвахана Пякуˮ яхад ӈэда Раиса Айваседо нимʼ паӈгалпавам манэлабтамбавы. Пыда Таркаʼ саля хардахад Тюменянʼ тохолкованзь товы. Панорць теневавамда таремʼ вадеˮӈадась:
— Небями панорць тенева. Ни, теˮме паӈгалпасеты. Ханяӈэхэˮна нянда сырцетыдмʼ. Тикы манзаямʼ хамэдамбив. Тенкана тохолкудмʼ. Тарця ӈамгэри сертаба нидмʼ товорˮ.
Раисаʼ хавна мале сян Пякуˮ яхад ӈэдаˮ ненэй неˮ панорманзь маˮлёвыˮ.
Хэбидя ялянʼ сырманзь тованʼ харвана ӈока.
Р. Ӈокдэтаʼ падвы
Сидяӈг: А. Яптикʼ тадтавы
Авторы
Няръяна Нгэрм
Темы