Няръяна Ӈэрм
Ꜧэрм’ тер” таӈото’, сырито’ таӈгм’ ни” хомбю”
Луци’’ яля’ падаркана пова’’ сусана, ӈадьбята тодо’’ яха’’на манзарана’’ ерв’’ по’ ямбан’ ханзер’’ манзара’’мамдо’ ваде’’ӈа’’. Ӈамгэ’ то’’олха ненадо’’ серо ӈадимдевамдо’ няна’’ тэвола’’. Хахаяда яля’ ты пэрти’’, халядани’’ серо тидхалембада департамент’ ӈэвахана мэна Андрей Рубашин вадамда мэ’’ӈась. Пыда округна’’ тиӈгывна ханзер’’ ты пэртя’’, халядана’’ помдо’ мадавамдо’ намдарабтась.
Тюку по’ сямянхат ӈока ты’ ӈамзам’ ӈыдаванзь тасламби’’. Няхар’’ ёнаркад вата тет юр’’ самляӈг ю’’ тонна ӈамзам’ ӈыдаӈгу’’. Тикадо’ 20% пирувна небой походанда ӈока. Вадавнандо’ ня’’марпада ӈамзам’ миреле’’махад ӈокавна тым’ ненэця’’ хабарталваха’’ тэврамби’’. Хэвада савам’ — самляӈг юр’’ есявна ня’’марпидо’. Хэвада вэварка — сидя юр’’ самляӈг юр’’мня ханӈа. Ма’’ним’’, хусувэй по’ тыто’ ӈамза’ саӈгом’ ӈокворӈа — 38,2 кг харва. Округханана’’ тарем’ сававна тына’’ лэтравана’’ няю’ ва ӈокамдамби’’. Тюку по’ тамна юкад вата мат’’ едэй вад’’ ӈадимда’’. Тарабата сулорпидо’.
Теда’ юкад вата предприятийха’’на ты’ ӈамзахат хуркари’’ ӈавыдота’’ ӈавар сертаби’’. Пудана самляӈг по’’ сер’ тикамдо’ тамна ӈокамдавэдо’. «Ямальские олени» предприятияхана едэй ханибтеӈгосьм’ тэмдавыць. Манзаяханандо’ ёльце тарана няд’’ма ӈэӈгу. Тасу яв’ няна ӈэрё’ едэй цехм’ нэць. Таняна по’ сер’ си’’ив юр’’ тонна ӈамзахад ӈавыдота ӈавар серта пирӈа’’.
Халядава’ нямна серона’’ ӈани’ ӈопой яхана ни’’ ну’’. Халям’ пэртя’’ ӈокханда ю’’ ёнар’’ тонна халям’ ватавы’’. Яханана’’ халяхат ӈобтикы ӈавыдота’’ ӈавар сертаби’’, тикы’ е’’эмня хуркари таславы’’ предприятий’’ таня’’. Ӈани похона тамна Новой Уренгойхана, Саляхардахана, Надымхана ӈадимда’’. Халэна’’ округрихинана’’ нидо’ мирдапю’’, ханяӈыдо’ тамна Казахстанан’, Белоруссиян’ ӈэдарамбидо’. Тамна Сербиян’, Узбекистанан’ ӈэдабтамбавандо’ няю’ тарана падро ма’’ламби’’. Тикы’ хавна Роскосмос’ ня’ падродо’ тидхалемби’’. МКСхана космонавтана’’ юкад вата сидя тэнз’’ консервахад ӈаврадамдо’ тэраба пирта’’. Нюрте’’э’ таняна консервына’’ 2022 похона ӈадимяць.
Яханана’’ сертабада’’ ӈавыдота’’ ӈавар’’ я’ тиӈгывна тамна сававна теневавандо’ няю’ хуркари’’ фестивальха’’, конкурсха’’ ӈэдалёрӈа’’. Тикыто’ поӈгана хибяри’’ теневабто’ тара, я’ сяр’ ниня’ тарця ӈавормандо’ няю’ ӈэрм’ тер’’ таӈото’, сырито’ немам’ ни’’ мэс’’, таӈгм’ ни’’ хомбю’’.
Марина Ярой’ падвы
Авторы
Няръяна Нгэрм
Темы