обновлено: 10:32, 15 ноября 2024
Няръяна Ӈэрм
Ӈэрм’ терӈэ тэнзана’’ ӈока’’
Ӈэрм’ ё’’ няна иленаӈэ ӈокава’’. Тодо’’ тэнз мэ’’ӈава’’. Илна’’ саир’’, вадина’’ хара’’ ӈани’ яӈга’’. Тарем’ ӈод’’ мал’’ ӈэрм’ терва’’. Россия яна’’ тиӈгэвна 2022 поход вадина’’ лэтрамба хуркари’’ ненадо серо минрева’’. Тандая’ носиндалава’ ирыхына ӈоб’’ няю’ нятва’ ялям’ ядабтамбавана’’ мальӈгана ӈарка учёнойхат вадам’ намдаваць. 2021 поход сертабавы манзаямдо’ ваде’’ӈаць.
Ӈани яхад товы’’ ханяӈэхэна сидна’’ ӈопой тэнзариӈэ пэрцеты’’. Нянандо’ мал’’ ӈоб’’ толсава’’. Ненэцие теневава’ е’’эмня, тикахад тамна нерняӈы илаӈганана’’ сидна’’ нивандо’ поёлтамбавандо’ е’’эмня учёной’’ ненадо мутрам’ сертавы’’. Ӈокханда тет ю’’ тодо’’ тэнз’’ ненэцие’’ ила’ нямна ӈэда’’ вади ӈопой ян’ ма’’лавыдо’. Тикы манзаядо’ «Интерактивный атлас коренных малочисленных народов Севера, Сибири и Дальнего Востока: языки и культуры» нюбе’’ӈа.
Невхы илаӈгад теневанина’’, едэй илма’’, мал’’ тикахад манэць, тола, намда пиртына’’. «Маня’’ хар’’на’’ атласм’ сертаба нядаӈгурӈаваць. Хусувэй харта яхананда илена тэнз иланда нямна таня’ паднась. Ӈани’’ ё’’ няна, США’, Канада’ няна тарця’’ атласдо’ ӈобтикы таня’’, маня’’ сертавэва’’ яӈга, невхы ила’ хавна едэй илма’’ ӈадимдемби. Тет ю’’ ӈэрм’ яна’’ тэнз’’ 28 Россия’ ё’’ терӈэ тара’’. Толырто’ тянё ненэцяма’’ ӈокханда 260 ёнар’’. Хусувэва’’ харта невхы илаӈгад нёдана сехэрэвнанда миӈа. Вадина’’, ембдярона’’, мядона’’ яӈгабато’ ӈод’’, мал’’ ӈэрм’ терва’’. Ханяӈына’’ иландо’ саир’’ тэхэд пере. Иле ява’’ ӈавнанда невхы иринана’’ иле ядна’’ таславы. Тенад’ хар’’на’’ яханана’’ сидя ӈэна’’ нина мэёвна нува’’. Илна’’ нямна ӈэда’’ вада’’ атлас’ терӈэ тараӈгу’’. Табековнана’’ СВО’ няна сайнорта’’ нина’’ сидяӈг’’ ӈани’ мюнянда таняӈгу’’», — тарем’ тодо’’ ӈэрм’ тер’’ Ассоциация’ ӈэвахана мэна Григорий Ледков лаханавы.
Манзаравы’’ учёной тидхалембадаӈэ, нермбэртяӈэ Валерий Тишков РАН’ академик таравы. Вадавнанда «сайт»‘ терӈэ ӈока по’’ ямбан’ тохоламбавы манзаидо’, тодо явна ӈэдалёромидо’, ӈока ненэцяӈгат намдавыдо’ мэвы’’.
Нина Вейсалова Ӈэрм’ тер’’ вади’’, теневабцо’’ Центр’ Ӈэвахана мэна ӈадимдевы атласм’ ёльце саву’’ӈада:
— Хусувэй ненэць хуркари я’ вэкана мэбта ӈод’’ манэць пиртада. Россия яханана’’ ӈамгэм’ саву’’ӈава’’? Ӈока тэнзм’ мэ’’мава’’. Ӈэрм’ терӈэ тет ю ‘’ тэнзва’’. Иле ява’’ сямянхат тоенана, тецьда я. Ханяӈына’’ толырто’ ӈули’’ тянё. Тарем’ ӈод’’ мэбе’’ӈава’’, илна’’ саир’’ пили’’ лэтрамбина’’. Няхатана’’ яӈгава’’, яна’’ ныхыӈэ тарава’’.
Ольга Павленко атласм’ сертаба тидхалеӈговы не, РГГУ’ проректор’ вадавна ӈарка манзаямдо’ мале 2021 похона пявэдо’. Наука’, тохолкова’ серо ня’’амбада Министерство’ табековна Ӈэрм’ тер’’ ила’ саирм’ ӈопой ян’ ма’’лавэдо’. Таняна хусувэй тэнз’ нямна тарця’’ вада’’ пады’’: харто’ вадавнандо’ тэнзамдо’ нюбе’’мадо’, илесь ядо’, иландо’ саир’’ ӈамгэхэд паӈгадёва, толырто’, вададо’.
Теда’ атлас’ мю’ юнета ненэцие падыби’’. Община’’ ӈэвахана мэна’’ таслахая’’, нито’ нямна падна’’.
Атлас тарода ӈарка. Ӈэрм’ няӈы яна’’ ила’ саирм’ ӈадимдемби. Я’ мидыхыд харто’ яха’’нато’ мюсерта’’, тыдо’ пэрта’’, халэ хадабада’’, ханена’’ нямна ӈокам’ хоӈгува’’.
Роза Долган Камчатка’ няна ӈэрм’ тер’’ серо нерня тидхалембада тарем’ ваде’’мэда:
— Яланда ӈопой ӈуданд таркам’ Пенжинский район’ ед’ тебдебат, таняна илена’’ юнета’’ ненэцие’’ нюбе толаӈгун, хурка тэнз ӈэвамдо’ таслаӈгун, хурка серо тасламбавамдо’ хамедаӈгун.
Харта’’ манэ’’ман харвабата’’, интернет’ сер’ тюкон’ тюда’’: ӈtlӈ’kmn’.ru. Та’’сий ненадумда’’мавна ӈани’ хось пиртара’’. Луца вада’ хавна тамна английской вадавна пады.
Галина Окотэтто’ падвы
