Няръяна Ӈэрм
Ёртяˮ варемдоʼ мэˮӈаˮ
Сельбя нувода паӈодандоʼ хая. Яваˮ тасехэйӈэ хая. Нероˮ, пэдараˮ вэбаˮ мале хаˮ. Тикы харахана икня ёрцяринаˮ тэтнаˮ. Пыдоʼ еˮэмняндоʼ таславы планадоʼ томдабиˮ.
Аксарковской халяданиˮ предприятийхана 180 тонна халямʼ ӈыдавыˮ. Планамдоʼ сиˮив юрˮ тоннаʼ пирувна томдавандоʼ няюʼ тамна юрˮ тет тонна халямʼ вата тараӈгу. Ӈэвахана мэнандоʼ Алексей Лукъяшкоʼ вадавна тедаʼ пайха сававна миӈа, ёртяˮ ӈаниʼ ватабидоʼ. Тюку ирыхына тамна яёлˮ халяˮ ӈадимдаˮ.
Тинханандоʼ манзаранадоʼ тамна маӈг ӈэвы. Ирыʼ серʼ самляӈг ненэцямʼ няˮамвыˮ, няхартоʼ сава иландоʼ пюсь хэвыˮ. Матˮ ненэцяˮ сяниˮ тонна халэ ӈопой яляхана манзаяйдоʼ. Ӈопой яляхана самляӈг ёнарˮ есямʼ недвопа пирӈаˮ, тедариʼ Хоˮ Саляʼ терхат таремʼ манзараванʼ харванаˮ яӈгуˮ.
Шурышкарской районхана Горковской халязаводахана ёртяˮ ӈаниʼ тэтнаˮ. Пыдоʼ мале 730 тонна халямʼ ӈыдавыць. Планханандоʼ 1050 тоннамʼ ватабатоʼ сероˮӈа. Тедаʼ мале ӈокаюмʼ пелямдоʼ томдавэдоʼ. Хусувэй яляʼ ненэциедоʼ сиˮив юрˮ кила халямʼ ёлавахататоʼ тэврамбиˮ. Нёяˮ, пыриˮ, лысуˮ, плотваˮ поӈгаӈгаˮ. Пайхаˮ ӈаниʼ таняˮ. Салабандоʼ няӈороˮмаʼ ӈэсондʼ планамдоʼ томдаванзь тасламбидоʼ.
Ӈани няхатоʼ манэць пыдоʼ манзаранадоʼ тас, ӈадьбятоʼ ниˮ янолараӈгˮ.
Марина Марюйʼ падвы
Сидяӈг: Марина Ярʼ тадтавы
Авторы
Няръяна Нгэрм
Темы