Хабарта пэяд’’

Приуральской районхы «Паюта» хабарталаван’ мале нердена тыдо’ тэвравыдо’. Сяхаринда мале вэба’ иры’ нюртей яляха’’на таняна яхана пэсетыд’’. Таёльцяӈгана Паюта’ ядувна ненэця’’ мюсе минзеты’’. Сехэрэндо’ ниня ӈэда хабарталван’ тыдо’ тэврамби’’.

Тюку по’ нерденаӈэ Ямальской район’ тер Максим Сэротэтто тыда тэвравысь. Хасаваюрм’ хабарталван’ танавысь. Максим тарем’ мась:

— Яр-Саляхы хабарталва нядни хубтаӈэ ереберӈа, тюкуюм’ сехэрыни ниня ӈа, хахаяванда е’’эмня тыни’’ тальняю’ танэйнась.

Юкад вата ӈоб’’ по’ ямбан’ хабарталваханандо’ манзаядо’ ӈули’’ тяхасовна тидхалевы. Няхар’’ си’’ив яля’ нерцю’ ӈанэкурӈа’’. Ервадо’ Алексей Верещак ма’’нисяв, ӈахат сидя ю’’ хасава ю’’ ненэця’’ма’’ хабартасеты’’. Тикахат небо’ матато’ сайнорманзь харе’’ индё’ ватовна хаяць. Сидя сян яля’ хэ’’мяхад тамна самляӈг ненэця’’ма’’ манзараванзь тута’’. Тюку по’ сидя ю’’ хибяри’’ тыдо’ хабарпаӈгудо’. Нердена ӈамзидо’ вэба’ ирыхына тохолколва’ ян’ ӈэдарамбидо’, районханандо’ мале ӈатейдо’.

Тэравы’’ тыдо’ хабарталван’ тювандо’ нерня’ таминдо’ ты’ лекар’’ манэ’’саръядо’. Таняна ӈод’’ ӈэсыто’ ерв’’ тыто’ нямдо’ маторпи’’. Мале хабар’’махадандо’ сёнзяндо’ мюйм’ ты’’ лекар’’ ӈани’ манэсаръядо’. Печатьм’ ӈабта’’махадандо’ ӈамзандо’ хурка ӈэвам’ тасламби’’, тикахат ненэця’ ня’’муванда еся ӈани’ пере. Тюку та’ ты’ ӈамза’ мир’’ нись яӈгав’’. Ӈэвахы категорийӈэ таславым’ — тет юр’’ самляӈг ю’’ есявна тэмдабидо’, нябим’ — юр’’ самляӈг ю’’ есявна хан’’ладо’.

Фото: М. Яр

Хабартани’’ манзарава’ ёльцяӈгана ты’ ерв харта сырӈа, ханзер’’ манзаравамдо’ маниеда, хад ӈэдя таняб’’ нянда тидпой’’ лаханаӈгу, теда’ ӈод’’ Максим Пирчикович тидпой’’ хабартани маниейдась. Теда’ тэвравы тэхэтата самляӈгримдо’ нябимдей категорийӈэ таслаць, ӈанидо’ мал’ ӈэвахы ӈэвыць.

Тюку по’ «Паюта» хабарталвахана 650 тонна ӈамзам’ ӈыдаванзь тасламби’’.

М. Ярой’ падвы

Сидяӈг: М.Яр’ тадтавы

Авторы

Няръяна Нгэрм

04:40, 10 сентября 2024

Темы