Няръяна Ӈэрм
Хабарталыдˮ
Вэбаʼ ирыʼ нюртей яляхаˮна округхананаˮ мале хабарта пэсетыдˮ. Нердена ты пэртяˮ тыдоʼ мале тэврэйдонзь. Небой понда тотревʼ Максим Окотэтто нянда ня юрˮ матˮ юˮ тымʼ танавэхэнзь.
Тюку поʼ Приуральской районхы «Паюта» хабарталвахана манзаранадоʼ тас. Няхарˮ юˮ тымʼ часхад вата хабарпидоʼ. Ӈопой тымʼ яланда ӈопой минута манзаяˮӈадоʼ. Тыˮ лекарˮ ӈамзи манэсоˮмахадандоʼ няхарˮ юˮ тусаʼ ӈамзари нябимдей категорийӈэ сертавыць. Ӈанидоʼ малʼ ӈэвахы, хэвадоʼ саваӈэ таславыдоʼ. Тикытоʼ няюʼ хэвада сава ӈамзидоʼ самляӈг юрˮ есявна тэмдаӈгудоʼ. Вэваркидоʼ — сидя юрˮ самляӈг юˮ есявна хандаˮ. Тэвравы тытоʼ хэваˮ тамна саварка ӈэсь пирӈадоʼ, тедаʼ ӈамзидоʼ тамна мивдавэяркаˮ. Максим Сэротэтто маˮнисяв, сава похона хабармы тыʼ ӈамза юрˮ килаӈэ харвасеты. Нисяната илаʼ мальӈгана тарцяˮ танявыць. Тедариʼ суюˮ хэвдоʼ тамна вэваркаˮ.
Тюку поʼ «Паюта» хабарталвахана матˮ юрˮ самляӈг юˮ тонна тыʼ ӈамзамʼ ӈыдаванзь тасламбиˮ. Тикахад ӈокамʼ хабарпатоʼ, хибяхарт пуняʼ ни ӈэӈгуˮ.
Марина Яр' падвы
Авторы
Няръяна Нгэрм
Темы