Няръяна Ӈэрм
Хабей’’ хардакохона
Ӈоб’’ ныланава’ яляхана Горнокнязевскхана хардандо’ соя’’ма’ ялям’ мэ’’ӈаць. Тикы харад Саля’ яв’ лаӈгхана ну. Васкуй’’ мальӈгэхэт хаби’’ мэлва яӈ э таславы. Тедахав’ нито’ хэвхана тодо’’ тэнз’’ ненэця’’ иле’’.
🗞Илева’ хаби’’ халям’ пэрӈа’’, тальцюна школадо’, нюдяко ӈацекыто’ садик ӈадимясь. Хардадо’ пирмдад’ ниняӈа, ид’ няю’ сыраць ханя тэри сомбой. Ӈыхы яхана ӈэда я’’ пе’ ниня ӈэдараха’’. Сабеӈока ненэця’ таняна илена яӈгу.
Тюку по’ хардадо’ Саляхардахадана’’ пере пэяць. Мале танякуй поход хусувэй ненадо ялям’ таняна ядабтамба пяць. Музейдо’ таня, тикахана хуркари’’ ненэця’’ мэсеты’’, теда’ ӈод’’ ӈани’ таня’ тэворӈ аваць. Хэбидя яляндо’ няю’ нюрцьм’ сертавыць. Ядэрп’’, манэ’’манда ӈ окась. Ненэй мяка’’на халя’, ӈамза’ евэй пиревыць, ӈаворӈ аваць.
Хэвнякуна етя мэлвахана футболхана сянакуць. Харто’ ембдяродо’ серхая, не’’ сянакуць. Сидя командам’ ма’’лавыць. Ненэй не’’, хабей’’ не’’ ной панытаць. Няби’’ хадян’’ не’’ ӈэвыць. Сянако пэвандо’ нерня ненэй футболист’’ тотрев’ сидя ян’ нулаӈгаць. Нидо’ торомдамбиць. Сиддо’ тидхалембададо’ танясь. Тад пуна мячикм’ тапарпа сюрбелыдаць. Ӈули’’ ва’’лёйвана харто’ помнандо’ сянакуць. Хуюмгарт мандалкад пэданадо’ яӈгусь. Не’’ поӈгад Роза Окотэтто лаханась:
– Маня’’ нябимдейӈэ ха’’мына’’. Хадян’ не’’ поӈгана саць ва’’лёй нядо’ танявысь. Маня’’ ӈод’’ варева’’ мэ’’ӈаваць, мячик’ пумна тиртя’’ то’’олхаваць. Нямэхэна командана’’ терад ма’’ладамзь. Телефуновна музейхана манзарана’’ си’’ми хонрамбиць. Мань теневана нини’’ хаӈ адамзь. Паныта сюрберма тоенарка. Панына’’ иды’’ ямб’’ ӈэним’’. Кубокм’, медальдава’’, ненадумда’’ми, ӈ удина’’ терад ня’’маваць.
Ненэсянда ӈод’’ лаханакурць няни вадавна, сюрберта’’ некоця’’ мячикандо’ пумна мерцяридо’ хан’’ӈась. Сиддо’ маниеня’’ нито’ тёрридо’ соць. Тарем’ мэкадавна хардандо’ соя’’ма’ ялям’ ядабтамбидонзь.
Солне Ӈокдэтта’ падвы
Авторы
Няръяна Нгэрм
Темы