Няръяна Ӈэрм
Хаерˮ сиддоʼ нядаби
Округнаˮ тыˮ лекарˮ еˮэмня няхарˮ юˮ «солнечной батарея» нюбета ӈавэ тэмдавыˮ. Ты хуркариˮ хабцяӈгат яӈгабадаˮ ненэцяˮ тикы мутра ёльце савуˮядоʼ. Телефондоʼ, ноутбукдоʼ, биркытоʼ мюй вади толабадаˮ ӈамгэритоʼ ныхысяламбˮ, яляʼ юдеркад манзарана панельхат тердембидоʼ.
Ненадовна ӈахаˮамна мюсерта ненэцяӈгˮ тэворта ты лекарахаˮ ӈокавна тарцямʼ ӈэдаравыˮ. Сямянхат ӈокавна Яʼ малʼ няби Тасуʼ яʼ няна манзаранахаˮ миˮмыˮ. Пэˮ нямна, Нядэй няби Пякуˮ, Хабиˮ ёˮмана ӈэдалёртахаˮ тикэхэд тянёркавна ӈэдаравыˮ. Ямалнаˮ ӈарка хардахана мэтадоʼ самляӈг. Лакамбойʼ округнаˮ тыˮ лекарˮ серо минрена ервʼ еˮэйӈэ тарана Владислав Мулявин таремʼ лаханавысь:
— Тюку поʼ тарця мутратна ӈаво сабе мэˮянаць. Тиртя ӈанохона вындʼ ты яӈгабавась хантаˮ нинаˮ ханабидонзь. Хубта янʼ тэвортаˮ няхаˮна ӈарка таромʼ хаˮмолаˮ, саӈговота генератор ниˮ содабюрˮ.
Ты пэртяˮ ӈаниʼ мэˮядоʼ, саваӈэ вадеˮядоʼ. Ӈобˮ мюсерта ненэцьʼ инда ядэрабцомʼ хэтвысь:
— Ӈавна мядонаˮ мюй ялэмдаˮмаӈэ лампари мэцетываˮ. Тедахавʼ ӈамгэриˮ едэйˮ мутраˮ ӈадивоˮмахад генераторˮ, бензинˮ, юреˮ пэмбюрӈаваˮ, тикыт малʼ саӈговодоʼ яˮавлыˮ. Мале сян поʼ тяхана яляʼ сэвхад манзарана батарей мэць пядамзь. Саваˮ, телефонанаˮ нядандоʼ «ӈавламбиваˮ», мядонаˮ мюйʼ ялэмдамбиваˮ.
Хаерˮ явоход ныхыдамдоʼ хомбадаˮ панельˮ тыˮ лекарˮ нядабиˮ, манзаяхана сиддоʼ тарабтамбиˮ.
Анна Яптикʼ падвы
Авторы
Няръяна Нгэрм
Темы