Няръяна Ӈэрм
Хайму’’ нятапёма
Таԓкахана хайму’’ дет ӈайта концерт’ «Герои рядом с нами» нимита мэ’ӈаш’’. Чики нятакома мероприятим’ школа-интернатхана мансԓанна’’, тохоԓампючетуӈ ӈашки’’ няш шеԓтаӈатоньш. Нитуӈ нятапёш нешанатуӈ — немянатуӈ нятакуш’’.
Неԓьня шитчет’дю’’ пуӈ чена хайноԓмаӈ дёԓьшкай шеԓу’’ ӈычимчеӈа’’. Ӈашки’удиӈ Ада Занегина хайму’’ куше нятапёмам вачаӈа’’, таньдет ӈайта постановкам’ шеԓтаӈа’’. Четаӈ шитчет’дю’’ пуӈ каймяхат маня’’ ӈаԓка дяханана диԓина’’ шанат тэмс’’ неша’’ ӈупчики хаймыхина мэна’’ нетуӈ нятапи’’.
Таԓкахай школа-интернатхана СВОхана мэна хайму’’ нятапёш ӈука ӈайватам шеԓташту’’. Четы ӈычимчемытуӈ концертхана хаймыхина мэни’’ куше мятуӈ камна мадянтоԓмам вачаӈа’’, куше мякнантуӈ немянатуӈ шичитуӈ ӈэтамам ӈычимчеӈа’’. Концерт’ камна благотворительный’ ярмаркам «Своих не бросаем!» нимита шеԓтаӈа’’. Куԓкаԓи’’ ӈамыдю’’ мичиԓпи’’ — ӈамаԓ, сувенир’, хcтмы ӈамыку’’. Тымтуԓта’’ каԓьтуӈ шаӈок вешам миман ха’ӈа’’, таӈокмана тэмташтутуӈ. Ӈопшеԓ ярмаркахана дюԓкат ва’та шичадю’’ дёнаԓ ӈок веш’’ ӈомта’’. Чики’’ вештоӈ хайноԓта’’ нена’’ нятапёта штаб’ «Зов добрых сердец» фондан ӈайтаптайтуӈ. Ярмаркахана ӈашки’уди’’ хайму’’ мэт хcтмы ӈамыку’’ ӈука’’.
Таԓкахай школа-интернатхана мансԓанна’’, тохоԓкота’’ таньше «Шьём Победу» нимита движенихина нятакош маньԓе куптана чепьӈаш’’. Лекԓу’’ мякна мэна’’, дятаԓёй хайму’’ панэт хайташту’’, хаймыхина мэни’’ ӈамԓат ӈомташту’’. Хайтуԓаши ӈашки’уде’’ технологии’ урокатуӈ минԓена учительтуӈ Раиля Миндиярова няташтута. Хаймыхи’’ ӈамы таԓамам ԓушинетоӈ неԓьшут намташтута. Чикиӈ камна нятако шеԓтамайтуӈ мероприятихина хайму’’ дет ӈайта выставка тадяӈаш, школантуӈ музей’ шеԓтамы. Таньняна СВОхана хайноԓмы’’ нешади’’ тат’ма’’ шат’’, хайноԓьш мэта’’ ӈамыку’’ ӈычимчеӈаш’’. Урокатуӈ пут тохоԓкота’’ ӈашки’’ кататату’’ — окопные свечи’’ шеԓтапёшту’’, дяԓнас пускохот маскировочный’ шентми’’ паӈкаԓпёшту’’. Таԓьша ӈамыдю’’ шеԓтапёш ӈашки’уде’’ школантуӈ музейхана мансԓана Нина Топоева тохоԓампёштута. Четаӈ концертан томы’’ нешади’’ хыниԓмаӈ мэты, ӈупчики тохоԓкота’’ ӈашки’’ мастер-классу’’ ӈычимчеӈа’’. Ӈупчики кататату’’ — окопные свечи’’ шеԓтапиш’’, маскировочный’ шентми’’ паӈкаԓпи’’.
Чикиӈ камна пентшата поскану’’ пытпёш’’, ӈомтапёш пы’татуӈ конуԓпи’’, электронный’ тирхана дяттоԓя’’. Каса ӈашки’’ робототехникам’ куше хомана мэ’мам ӈычимчимпи’’. Чики нятакома мероприятим’ шеԓтамы’’, концертан хыниԓмантуӈ мэт томы’’ неша’’ маньшту’’: хаймыхина мэна’’ нена’’ ӈокна хома шоньшахана нятапётдяна’’, чикехcна хома ӈайты. Четаӈ ӈука тэмс’’ неша’’ хадям няна СВОхана мэӈа’’. Меԓ нэхэԓтаӈа’’, меԓ мяктуӈ тутӈа’’.
Автор: Андрей Пяк патмы
Авторы
Няръяна Нгэрм
Темы