Халяда’’

Маӈгты’’ иры’ юкад вата самлянзимдей яляхана округханана’’ Саля’ яв’ мюмня халяда пэяд’’. Хахаяда ӈэда предприятий’ манзарана’’ Саля’ яв’ икня таӈга хане’’.

Приуральской районхана таӈы халядавадо’ пэй’’. Аксарковской халядани’’ предприятий’ ненэциедо’ Саля’ яврихина ни’’ халяда’’, пыдо’ еси’’ хара’’мана ватаӈго пир’’ӈадо’. Ёртидо’ юкад вата яхана халям’ хадаби’’, ӈокханда няхар’’ ю’’ поӈга’ тер’’ манзара’’. Тюку по’ мале няхар’’ юр’’ тонна халям’ ватавыць. Ӈэрёй’ салабанда ёльцянд’ тамна хасаваюр’’ тонна халям’ ӈыдаванзь тасламби’’.

Аксарковской халядани’’ предприятий’ ерв вадавна, тюку по’ малева’ ёльцянд’ тамна мат’’ юр’’ тонна’ халям’ ӈыдабато’ тара. Тикыдо’ таросяда халя’’ ӈэӈгу’’: пыри’’, нёя’’, падвы халя’’, лысу’’.

Ӈэрм’ тер’’ е’’эмня халядава’ няю’ саць сава юнм’ намдаваць. Сидна’’ халэ хадаба ӈэдарамбаӈгу’’. Вэба’ иры’ нердена яляхад едэй’’ вато’’ ӈадимда’’. Тикахана ӈэрм’ тер’’ ӈаябаддамдо’ хадавандо’ няю’ ва’’лер’’ сертаба ни тараӈгу’’. Пыхыдадо’ ӈэрм’ тер’’ реестран’ падвы’’ сяни яӈорэй’ халям’ хадабава’ няю’ падро ни’’ сертабаӈгу’’. Пыхыдадо’ реестран’ нивы падрабтавы’’ ненэця’’ пилю’’ иры’ 25 яля’ ӈэсонд’ падродо’ падбато’ тараӈгу’’. Тикахана тованда 2027 похона таӈга ханеӈгу’’. Падродо’ халядани’’, ты пэрти’’ серо’’ тидхалембада департаментан’ ӈэдарамбабато’ тараӈгу. Ти: Салехард, улица Республики 73. Вэба’ иры’ нюртей яляхад яноларабато’ ни серос’’.

Тедари’ округна’’ тиӈгывна халядана’’ поӈгадо’ икад терси’’ нидо’ нэкалпю’’.

Автор: Марина Ярой’ падвы

Авторы

Няръяна Нгэрм

06:00, 30 июня 2026

Темы