Няръяна Ӈэрм
Халяданаˮ хутоларэйдˮ
Халяданаˮ ненэцяˮ тедаʼ ёльце варемдоʼ мэˮӈаˮ. Пилюˮ ирыхына халя харта ӈокворцеты. Хэвы сиˮив яляхана Приуральской районхад ёльце сава юнмʼ намдаваць. Таняна халянда ӈока ӈэсь ёраць лакриʼ ӈэвадавыдˮ.
Аксарковской халяданиˮ предприятийхана пилюˮ ирыхына саць тэтналыдˮ. Хасӈэ хэˮмяхаданда есиˮ хараˮмана хадырмыˮ халэдоʼ Саляʼ явмʼ пандамба пяˮ. Поӈгадоʼ хусувэй яляʼ панаць нэкалпидоʼ. Ӈобˮ яляхана матˮ-сиˮив тоннамʼ Хоʼ Салянʼ (Аксарканʼ) тэврамбиˮ. Ӈопой хардахана, ханибтеӈгосьʼ няна манзаранидоʼ ӈулиˮ хутолараӈгаˮ. Тадӈоˮ юкад вата сидндет ненэцяˮ ӈопой яляхана сиˮив тонна халямʼ падʼ мюʼ сабыба, ханибтеӈгосяхаˮ пэмба выдараӈгаˮ.
Ӈобˮ товахана Виталий Тоболько сидндет юˮ кила халямʼ харданʼ тэвравысь. Пыда сидя юкад вата поʼ ямбанʼ манзараванда ямбанʼ таӈоковна халяʼ танявамʼ ни тензебтембюˮ. Вадавнанда, пуна тамна яёлˮ халяˮ ӈадимдаˮ, тикыд ӈобтикы саць ӈокавна поӈгаӈгасетыˮ.
Предприятияндоʼ ерв Алексей Лукьяшко маˮнисяв: «Тадриʼ ӈаниʼ хане пэӈгудˮ. Халянда ӈока ӈэвамʼ ӈэдарамба ни серосˮ. Тет плашкоутнаˮ салабахана тердеˮмахаданаˮ халямʼ няˮмарпадаˮ тарсиˮ ниˮ хутолараӈгаӈгуˮ. Тедаʼ тэри халямʼ няˮмарпадаваˮ хардахана тянё. Юкад вата сидндет ненэцяӈгаˮна ӈопой яляхана сиˮив тонна халямʼ ханибтемба, падʼ мюʼ сабыба тоена. Ненэцяндаваˮ ӈокамбовна хобˮнанаˮ няндоʼ ӈобˮ яляхана тет, самляӈг ёнарˮ есямʼ салдамба пирӈаваˮ. Ирыхына юрˮ самляӈг юˮ ёнарˮ есяӈэ ханда. Тедариʼ таремʼ манзараванʼ харванаˮ яӈгуˮ. Неняӈгˮ ирыхына яляʼ серʼ тэри сидндет юˮ, юрʼ мянʼ киламʼ тэврамбасетыˮ, тамальӈгана таӈгаць, ӈока хибяˮ недбиндоʼ тянё ӈэсь хаяць. Пилюˮ ирыхына манзаяваˮ ӈокаˮма.
Тедаʼ пайхаˮ, палкурˮ, идюрцямʼ ватабиˮ. Тадриʼ нёяˮ, пыриˮ ӈадимдаˮ. Таʼ ямбанʼ предприятияханандоʼ самляӈг юрˮ тонна халямʼ ватавыˮ. Планамдоʼ томдавандоʼ няюʼ сидя юрˮ тоннари хаи. Халяда тамна вэбаʼ ирыдоʼ таня, таʼ ёльцяӈгана манзаранаˮ ӈаниʼ тараӈгуˮ. Тюку юнмʼ падыбавана мальӈгана ненэциедоʼ ӈани ёраць лабцевыдаць.
Марина Ярʼ падвы
Авторы
Няръяна Нгэрм
Темы