обновлено: 10:18, 30 января 2025
Няръяна Ӈэрм
Халядана’’ таӈгм’ ехэра’’
Халядана’’ ненэциена’’ таӈото’, сырито’ планм’ томдаба варемдо’ мэ’’ӈа’’. Тедахарт салабанда няӈоро’’махад тарем’ ӈод’’ таславы манзаидо’ сертабабто’ тара. Тикахана тецьдахана ӈуда ханиво’’махад ехэра’’. Ня’’амнандо’ тарця юн намдаваць.
Теда’ округханана’’ ватаӈгода’’ ӈани’ яӈга’ сихито’ тэввыд’’. Шурышкарской район’ няна ООО «СП «Горковское» халядана’’ хане мэта мирвадо’ ит’ пядвыдо’. Пыдо’ техэ яханандо’ поӈгари ни’’ мэс’’. Карвожгорт хардакото’ няна Ӈарка, Нюдя Саля яв’ лаӈг’ хэвхана ватаӈгурӈа’’.
Нюдяко’’ хардаха’’на ӈод’’ халядани’’ предприятийха’’на манзарана’’ ӈани’ тэри ни’’ ӈамдю’’. Пыдо’ таӈы ватаӈгован’ хамеку’’. Поӈгадо’ сэдорпи’’, ӈанудо’ сулорпи’’, тамна ӈани’’ тарана серодо’, та’ мэ’’мандидо’ тидхалемби’’.
Приуральской районхана лимбя’ иры’ юкад вата самлянзимдей яляхад мале няхар’’ ю’’ тонна халям’ ӈыдавыць. Пыдо’ Харсаим’, Ямбура’, Товопогол’ лаӈг’ хэвхана ватаӈгурӈа’’. 2025 похона Аксарковской предприятий 680 тонна халям’ ӈыдаванзь тасламби. Тикахат палкур’’ — сиднтет ю’’ сиднтет тонна ӈэӈгу, пайха — мат’’ ю’’ самляӈг, тамна си’’ив ю’’ — тэри яёл’’ халя’’. Небо’ юр’’ тонна пайхам’ хадаба ӈэдаравыдонзь, идюрця — си’’ив ю’’ тонна ӈэвысь.
Сяхаринда округханана’’ сие ниць иры’ ӈэсонд’ си’’ив юр’’ тонна халям’ ватасеты’’. Тюку по’ ӈод’’ ӈани’ тарем’ ихиняндо’ тасламбидо’.
Марина Яр’ падвы