Халядани’’ няд’’мад ӈадимде’’

Ёртя’’ ненэцие’’ ед’ ёльце сава юнм’ намдаваць. Мале сян иры’ ямбан’ округна’’ халядани’’ серо тидхалембада’’, ханзеркав манзаидо’ таняд перена’’ ерв’’ халядана’’ таӈоця’’мана ӈэдалёрӈаць. Пыдо’ ӈамгэ нянандо’ таравам’ хонрамбиць. Тикы ватом’ округна’’ ӈэвахы ерв ӈадимдедась.

Сян иры’ сер’ мале ӈока ян’ нултаӈгаць. Ямална’’ тиӈгывна ёртяхат хибяхартм’ ниць юр’’, ненэцяӈгат намдавы’’ вади мал’ падарт’ падыбидонзь. Ханяӈы’’ тоенана’’ серо таминдо’ ӈопой яхана тидхалембидонзь. Ӈэрм’ тер’’ тарабцо ӈобт’ ма’’ла’’махадандо’ ӈопой тарана падарм’ ӈадимдець. Хэвы си’’ив яляхана няна’’ ваде’’ӈадонзь. Едэйвана таславы няд’’мидо’ ӈани похона манзаралтыд’’.

— 2027 поход ӈэрм’ тер’’ ӈаябаддамдо’ ватавандо’ няю’ сяни’’ падро ни’’ сертабаӈгу’’;

— Таросяда, яёл’’ халям’ (нёя’’, пыри’’, тамна ӈани’’) хадабава’ няю’ няд’’мамдо’ 13% пират ӈарамдаӈгудо’, 120 есявна ня’’марпамахадандо’ миртя 136 есяӈэ ханда;

— Харе’’ тэмдабада станциято’ мире 30 ёнар’’ еся пирувна пэмбаӈгудо’, бензин’ няю’ –12 ёнар’’ есям’ похона тамбаӈгу’’;

— Ненэцие икня мэ’’манда сидя спасательной жилетм’ тэмдаба нядабаӈгудо’ (ӈопой мяд’ терха’’ таславэхэ’ ӈэӈгуху’);

Тарця’’ няд’’ми ёртина’’ е’’эмня хахаяда яля’ ӈадимдевыць. Тедари ӈэрёй’ сыранда хамва’ ӈэсонд’ ненэця’’ планадо’ томдабаӈгу’’, ненэйвана сэврихина ханена пи’ талм’ нидо’ ӈэдарамбаӈгу’’.

Марина Ярʼ падвы

Авторы

Няръяна Нгэрм

04:12, 23 сентября 2025

Темы