Няръяна Ӈэрм
Халяданиˮ нядˮми ӈадимдембиˮ
Ервонаˮ таʼ халяданиˮ нямна ӈэдалёроˮмахадандоʼ тедаʼ ӈадимдевы нядˮмидоʼ вадеˮлаˮ. Маˮнимˮ, ӈани похоˮ таслаˮ, ёртяˮ недбямʼ ӈокамдаӈгудоʼ.
Тарця юн хэвы сиˮив яляхана ӈадимясь. Предприятийхаˮ нядˮмаʼ есяӈэ ӈадимдембадамдоʼ ӈокамдаванзь пэрӈадоʼ. Январь ирыʼ нюртей яляхад 13% пирувна ӈарамдамбидоʼ. Ӈопой тоннаʼ пирˮ халяʼ няюʼ нядˮмаӈэ 120 ёнарˮ еˮэйӈэ 136 ёнарˮ есямʼ тамбаӈгуˮ. Недвоˮмыˮ есьтоʼ пеля 60% пирувна манзаранитоʼ недбяӈэ ханпата сероˮӈа.
Ӈэрмʼ терˮ илаӈгана тарана сермʼ ёртяˮ ненэцяӈгаˮна лаханакурмандоʼ пудʼ ӈадимдевэдоʼ. Халяданиˮ серо минрена департаментʼ ӈэвахана мэна Андрей Рубашин вадамда мэˮмысь:
— Маняˮ манзаяваˮ няхарˮ янʼ тярпиваˮ: янаˮ тер халяхана ӈавламбабанаˮ тара, ёртяˮ недбядоʼ сава ӈэя, ненэйвана икня халянаˮ ӈокадмʼ лэтрабиваˮ, пуднаˮ хаёдаˮ халяʼ ӈавыдмʼ теневабто тараˮ.
Тамна тикы нядˮмиˮ поӈгана ӈаниʼ ӈобˮ вада мюсертаˮ ненэциеˮ нямна ӈа. 2027 поход халямʼ хадабавандоʼ няюʼ сяниˮ юрˮ яӈорэйʼ падро сертабабˮтоʼ ни тараӈгуˮ. Ӈахат ӈэрмʼ терˮ ӈаябаддамдоʼ ватавандоʼ няюʼ яӈга падро сертабиць. Тикыдоʼ вэбаʼ ирыʼ 1 яляʼ ӈэсондʼ ӈэдабтамбидонзь. Сяӈокмʼ ватавамдоʼ падаркана падыбидонзь. Тедаʼ хане мэтаˮ мирвадоʼ яӈгамдаваʼ нямна департаментхана манзаранаˮ тюˮуйˮ ервхатоʼ тамна ӈаниʼ падармʼ падвыць. Тарця ӈавэ нядˮмяць масиˮ ӈэрмʼ терӈэ халядаваʼ нямна илмаˮ ненэсянда сибёмда.
Автор: Марина Яройʼ падвы
Авторы
Няръяна Нгэрм
Темы