Халям’ хадабава’ вато несэймдаӈгудо’

2025 похона халям’ хадабава’ нямна ӈэда’’ закон’’ вато’’ несэймда’’. Салехардахана ӈарка тасалковахана округна’’ серо минрена’’ ерв’’, учёной’’, палытана’’ ма’’лёвыць.

Тарця тоенана серкана ӈопой иӈут’ ха’’амвамдо’ тасламбавы’’. Халям’ хадабава’ серкана мэ’’манда’’ закон’’ вато несэймдамбавам’ ваде’’мы’’. Ненэця’’ нерняӈы илаӈгана тикы вадидо’ нёдаӈгу’’.

Ямална’’ нермбэртя’ марцьхы Сергей Карасев’ вадавна сямянхат тоенана’’ серодо’ ти’’: халям’ хадабади’’ предприятие’’ манзаям’ тид’’ минрева, халэ вадабава, ид’ сяр’ нийм’ лэтрамбава, учёной’’ манзая.

«Ӈобкана ӈопой серма’’ тасламбива’’. Халям’ хадабада’’, палытана’’, учёной’’, мал’’ харто’ индо’ ӈу няхато’ мэ’’эйдо’. Тарем’ нерняӈы манзаява’’ тидхалембива’’», — АПК’ департамент’ ӈэвахана мэна Андрей Рубашин ӈамгэ’ е’’эмня ӈобт’ ма’’лёвамдо’ ваде’’мы.

Неноховавна учёной’’ хурка’’, сян халя’’ тэнз’’ танявам’ ваде’’мы’’. Халям’ ня’’марпада’’ предприятие’’ ервхат 2024 похона сяӈок халям’ ватавамдо’ намдавы’’.

Ӈэрм’ тер’’ е’’эмня мэ’’мы вададо’ квота’ нямна ӈэвы. Предприятияха’’на манзарана’’ ёртя’’, тэри харто’ мято’ тер’’ е’’эмня халям’ хадабада’’ ненэця’’ по’ ямбан’ ӈокамбояркавна ватаӈго пиртадо’. Тадри’ е’’эмнанда’’ падаӈгува’’: закон’ сер’ ӈопой мяд’ тер’ е’’эмня сяӈок халям’ ня’’ма сава ӈэӈгу.

Г. Окотэтто’ падвы

Авторы

Няръяна Нгэрм

05:41, 12 января 2025

Темы