Няръяна Ӈэрм
Хане пэядˮ
Невхы илаӈгана ханяӈыˮ нувʼ сармикˮ, яʼ сармикˮ ӈавраӈэ тарасетыˮ. Ӈадьбятоʼ тарцяхаˮ ханесетыˮ. Тедаʼ хусувэй ӈамгэˮ тас ӈэваʼ мальӈгана хасаваˮ таремʼ ӈодˮ ханеˮ. Ӈопой, тунидоʼ мэˮмандоʼ няюʼ хусувэй ханесэянʼ таславыˮ ялэдоʼ таняˮ. Тиканда таˮаль, ханзелиˮ тяхарабатˮ, няˮамра пиртанʼ, есямʼ салдамбаӈгунʼ.
Хахаяда яляʼ ханеваʼ яляˮ ӈаниʼ ӈадимяць. Округнаˮ биоресурсʼ серо минренаˮ ервˮ тарця тарана юнмʼ вадеˮӈаць. Маˮнимˮ, тедаʼ тэвасихиˮ, тёняхаˮ, хабартахаˮ ханеваʼ ёльцьʼ пэйˮ. Тэвасинʼ, тёнянʼ — яра ирыʼ 28 яляʼ ӈэсондʼ хане ӈэдарамбидоʼ. Хабартахаˮ– январь ирыʼ 10 яляʼ ёльцяндʼ, идʼ писянʼ — яра ирыʼ пудана яляʼ пират ханеӈгуˮ. Сяхаринда яхананаˮ тэвасинʼ ханена пилиˮ ӈока ӈэсеты.
Вэбаʼ ирыхыд ханеваʼ няюʼ падро мипавадоʼ яӈгамы. Тарця юн таславы сайтхана хось, тола пиръядоʼ.
Марина Яройʼ падвы
Авторы
Няръяна Нгэрм
Темы