Няръяна Ӈэрм
Ханеваʼ нямна
Ямалнаˮ ӈардавна тюку поʼ ненэцяˮ ханевандоʼ ёльцьʼ тобˮ, ӈокарка ханесэйдамдоʼ хада пиртаˮ. Ханеваʼ серо няˮамбадаˮ ервˮ тяхакуйˮ похоˮна ханесэйӈэ таславы яʼ сармикˮ толырмʼ ӈокамдаӈгудоʼ.
Тюку илаӈгана ханенаˮ законʼ ватомʼ ёльце нёдабатоʼ тара. Сяхаʼ, хурка, сян ханесэймʼ хадавамдоʼ ненадо падаркана палытанаˮ тидхалембидоʼ.
Ӈарка ненэцяӈгавˮ ӈахат хартоʼ тикыˮ серо теневасетыдоʼ. Таросиˮ яʼ, нувʼ, идʼ сармик нисетыдоʼ маядамбюˮ.
Пилюˮ ирыʼ нюртей яляхад ненэцяˮ несэймдавы ватоʼ серˮ хане пэӈгуˮ. Тикыʼ нямна пидтемяхаˮна мэйравы падармʼ хусувэй хибяри округнаˮ серо минрена ервˮ сайтхана тола пирӈада.
Ервоˮ вадавна, ханеваʼ нямна ӈэда ватомʼ ӈадьбятоʼ несэймдавэдоʼ: яʼ, нувʼ сармикˮ тодоˮ тэнзувнатоʼ ӈокмаˮ. Поʼ ямбанʼ Ямалʼ ӈардавна ненэцяˮ хадавандаˮ ханесэйдоʼ тамбирˮ ӈэӈгуˮ:
— хабартаˮ: небойˮ 867 ханесэйхад 1298 пират хада ӈэдарамбаӈгуˮ,
— яʼ мядотаˮ: 674 ханесэйхад 761ʼ ёльцяндʼ ӈокамдавыдоʼ,
— тосˮ: 5004 ханесэйхад 5130ʼ ёльцяндʼ ӈокамдавыдоʼ,
— нензадˮ: небойхад ӈопой ханедавна ӈокмыˮ, 17 нензадмʼ хада пиртаˮ.
Тюку ирыʼ нердена яляхад Ямалʼ ӈардавна ненэцие яʼ мядотавна хане ӈэдарамбидоʼ. Лукˮ, хоркыˮ ханедаӈэ мэˮманʼ харванаˮ юкад вата самлянзимдей яляʼ пиркана ханеванзь хандаˮ. 25 яляхад нюдя пэвдей ирыʼ пират ябтоˮ, нябыˮ, тамна ӈаниˮ нувʼ сармикˮ ханесэйӈэ тараӈгуˮ.
Галина Окотэттоʼ падвы
Авторы
Няръяна Нгэрм
Темы