обновлено: 10:44, 08 декабря 2024
Няръяна Ӈэрм
Хабартава’ паӈо
Ямал’ тиӈгывна тэсавэй’’ яха’’на теда’ саць тэтна’’. Хабарталваха’’ ненэця’’ тыдо’ тэврамби’’. Округханана’’ нерденаӈэ ты пэртя’’ Приуральской районхы «Паюта»хана хабарта пясетыдо’. Мале вэба’ иры’ нюртей яляха’’на тыдо’ тэврэйдонзь. Тюку ялэ’’ пиркана яхана паӈодандо’ хая.
Сямянхат ӈыхы яхана ӈэда Ямальской районхы, Сёяха харад’ няна, хэвы си’’ив яляхана нердена тыдо’ тэврэйдонзь. Тамбей’, Сёяха’ вымна мюсерта’’, Саля’ яв’ малхана илена’’ тыдо’ танавыдонзь. Тикы’’ поӈгана «Валама», «Харп», КФХ «Карское», ООО «Ямальское» общинахана мэна’’ ненэцие’’ ты’’ ӈани’ таня’’. Ханяӈыдо’ хабармандидо’ харто’ тэврамбавыдо’.
— Соё’’мина’’ няць хабартава’’, мань хардахана иледм’, тыни’’ няханани мэ’’. Теда’ нувода тосакабты’’, сэрад ӈэва’ сер’ ӈа, ӈадьбята ӈани’’ похо’’ тасла’’, ӈокамбовна тэдми хадаӈгудм’. Ханяӈы’’ хадохонана’’ мале салабаӈэ хэвысь, тикар тына’’ нядан’ тадвысь. Выӈгана мэна ненэцяӈгана ты — иланда саир’’, ӈадьбята тына’’ ӈокадм’ лэтрава’ е’’эмня ӈахакуд тоса серо’’ӈа. Мале ныхысялмы’’ пуна нарэйндо’ ёльцянд’ ни’’ тэваӈгу’’. Тэри хаӈгу’’ — тарем’ Сёяха’ тер Эдуард Сэрпива мась.
Ӈобтикы тыда тэвравы Евгений Вануйто тарем’ лахана:
— Мань хасаваюр’’ тым’ тэврадамзь. Мядо’’мана ӈэдалёвани сер’ си’’ми хонрамбавы нини’’ ты ӈани’ тэврэйнась. Мале сян яля’ ӈэдалываць, ханяӈэхэна тамина’’ пихиня сеӈгасетыва’’. Тына’’ «Харп» общинам’ няд’’мяць мипина’’. Есям’ минхандо’ тамбидо’, сидя яля’ хэ’’мяхад ӈэдарамбидо’. Маня’’ яна’’ няна ӈани’ сэрад ӈэва’ сер’ ӈа, сельбяда ямбась, пон’ сарёць, яда пяны’’мана нись тыра’’, таминда ханимясь, тикар вэнзер’’ тэхэ’’на ха’’маӈгу.
Сёяха’ няна забойкадо’ ӈарка пэвдей иры’ 16 яля’ пиркана ёльцеӈгу. Тюку хабарталваханандо’ мат’’ ёнар’’ няхар’’ юр’’ тым’ хадаванзь тасламби’’.
Тазовской район’ няна ӈани’ хабарта пэйдаць. Тюку по’ яханандо’ ӈоб’’ ёнар’’ тонна ты’ ӈамзам’ ӈыдаӈгу’’. Нердена тыдо’ тамна хэвы си’’ив яляхана тэврэйдонзь. Яханандо’ «Тазовские олени» нюбета обществан’ мипидо’. Тикы’ хавна фирма «Ажаар» няби СПК «Тазовский» ӈани’ манзараӈаха’. Районханандо’ хабарталвидо’ мале ӈахакуд та’ ӈанэдэйдонзь. Хор’’ ирыхына тыдо’ толэйдонзь. Няхар’’ хабарталва’’ мале хамедавы’’. Паютехэна, Ӈэдяӈгана носиндалава’ иры’ нердена ялэ’’ пиркана хабарманда’’ тыдо’ тэврэйдонзь. Хальмер’’ Седехэна тандая’ манзара пэйдаць.
Ӈэдяӈгана хабрталвахана ӈокханда няхар’’ ю’’ ненэця’’ манзараӈгу’’, Паютехэна — тет ю’’ ӈэӈгу’’. Районандо’ тиӈгы хабарталваха’’ манэць таняна (Паютехэна) сямянхат ӈока тым’ хадаӈгу’’ — 397 тонна ты’ ӈамзам’ ӈыдаӈгу’’, Ӈэдяӈгана — юр’’ тонна ӈэӈгу, Хальмер’’ Седехэна — 125 тоннам’ ӈыдаванзь тасламби’’. Паютехэд, Ӈэдяӈгад тыто’ ӈамзи сыра’сехэрэвна тэволаӈгудо’. Тандая’ хабармы’’ тыто’ ӈамзи тедари’ яханато’ лэтамбаӈгудо’. Хальмер’’ Седехэна нердена тыто’ ӈамза’’ тадри’ хардаханандо’ лабкаха’’на ӈадимда’’. Паюте харад’ хэвхана тамна «Ажаар» обществохана хабарта’’. Ӈоб’’ яля’ юр’’ тым’ хадаби’’. Пыдо’ 124 тонна ты’ ӈамзам’ ӈыдаванзь тасламби’’.
Районханандо’ хусувэй хабарталвахана ты’’ лекар’’ манзара’’. Хадавандидо’‒ поса’ хабцяӈгад яӈгавы’’, биркасавэй’’, тарця’’ тэридо’ тэврамби’’.
Марина Яр’ падвы
