Няръяна Ӈэрм
Хэбидя лаханакомʼ манэˮӈаваць
Ӈобˮ яляʼ Хоˮ саляʼ харадʼ культураʼ мякана ненэцяˮ маˮлюрӈаць. Таняна «Легенда о стихиях тундры» нюбета спектальмʼ манэˮманзь товы ӈокась. Лохо панˮӈась.
Сценаʼ ниня хэбидя лаханакомʼ манэˮлабтамбиць. Сё хынобтамбиць, таранаˮ тараць. Ӈани тэнзм мэтаˮ ненэцяˮ хамэдамбаваʼ еˮэмня, ненэй няби луца вадавна лаханаць, сёётаць.
Ненадо спектакльмʼ серта Антонида Сметанина таславэдась. Пыда ненэй вадавна ӈэдаˮ лаханако, хобцоку, сё маˮламби, падыби. Аксаркаʼ харадхана культураʼ мякана манзара. Инзеленахаˮ вадеˮмыда тарцяˮ:
— Мань ӈавнаниʼ Лаборовойхана соядамзь. Хойʼ иламʼ сававна теневав. Нюдяко ӈэвани мальӈгана тыˮ мякана илеваць. Пэˮ хоёˮ нямна мюсерцетываˮ. Тюку похоˮна илебейˮ ненэцяˮ харадʼ илаӈгана илеˮ. Таремʼ ӈодˮ вадамдоʼ, иландоʼ саирмʼ теневабтоʼ тара. Тикы еˮэмня хуркари ӈаво сертабасетываˮ. Тедаʼ ӈадимдембавы спектакльнаˮ таняваʼ еˮэмня, сиˮни тотревʼ манзаранаˮ ниˮни няць проектмʼ серта таславаць. «Президентской фонд культурных инициатив» нюбета конкурсанʼ пректваˮ ӈэдараваць. Тикыʼ серʼ небой поʼ грантмʼ няˮмаваць. Пирдыртиˮ поӈгад сиднаˮ тэравыць. Няˮмавы есяхаˮнанаˮ сёётэйˮ, таранаˮ нинаˮ ембдярад, тамна ӈаниˮ ӈамгэдамдоʼ тэмдаваць. Ӈока ӈамгэри тарась.
Лаханаковаˮ едэй мутры нядˮмяць сертабиваць. Театральной постановкаʼ серʼ ненэй ненэциеˮ илаʼ саирмʼ, вадамʼ манэˮлабтамбиваˮ.
Ненэсянда спектакльдоʼ маниеваʼ тоˮолхарись. Хусувэй ӈамгэмдоʼ сававна таслахая сертавэдонзь.
Руфина Окотэттоʼ падвы
Сидяӈг: Марина Ярʼ тадтавыˮ
Авторы
Няръяна Нгэрм
Темы