Няръяна Ӈэрм
Хо’’ саляхана
Хо’’ саля’ хардан’ Ты пэрти’’ ялям’ манэ’’манзь хан’’ӈаваць. Маня’’ ӈэрм’ терӈэ тарця ялэ’’ ӈули’’ ӈатесетына’’. Хусувэй хибя нида ядабтаӈгу, тарана ӈамгэдамда хоӈгу. Тюку по’ мядонди’’, хардандо’ тер’’ е’’эмня юкад вата хасаваю’’ мядм’ мярвыць. Ӈобнзер’’ ма’’лёвы’’ пирдырта’’ няхато’ сырӈаць, мирдатани’’ мэлвидо’ пан’’ӈаць. Сё мэта’’, тарана’’, ӈацекы сянакултамбада’’ варемдо’ мэ’’ӈаць.
Мэбета’’ сёбар’’
Пирдырмидо’ ханзер’’ ӈадимдембавам’ ӈамгэри хардахана серо минрена’’ харто’ тасламбидо’. Сянаковаха’’на мал’ ныхындо’ пирувна варемдо’ мэ’’ӈаць, няхато’ маймбиць. Нюртейӈэ ныхыдырта’’ пэйдаць. Пудандо’ ямб санахана санарӈаць. Ӈани’ ӈопой тоенанадо’ — хано’’ санарпава. Ламбаха’’на сюрберти маниеваць. Тюку по’ помнандо’ мяд’ тер’’ пирдырӈаць. Тад пуна таротаха’’ сырӈаваць. Няхатата саць мэбетадо’ — Илья Лаптандер. Тикы нянда пуд Александр Вануйто’ ныхыда ва’’мысь. Няхаромдэйӈэ Павел Тайбери ха’’мыць.
Няваталаӈгурта’’
Сямянхат ӈатенадо’ — тэхэ’’на няваталаӈгова. Пэвсюмя’ някуна, пирдырмито’ мале’’мяхад ненэця’’ мал’ няваталаӈгодаха’’ сырманзь ма’’лыць. Яха’ салаба’ нимня хадридо’ хацебтысь. Нита нерня’ Алексей Тайбери ха’’мыць. Тыда саць мере’’мы’’. Пуданда Матвей Лаптандер тэвыць. Павел Тайбери ӈодь’’ варкась.
Мел’’мана сэдорана’’
Выӈгана илена’’ ӈэрм’ тер’’ ембдяродо’ сяхаринда сава’’ ӈэсеты’’. Ӈацекы’’, хасава’’, не’’ паныдо’ манэ’’лабтамбиць. Конкурсхана сямянхат паскойдо’ тэрабиць. Серо теневана’’ ӈули’’ тяхасовна манэсаръядонзь. Не’’ нюдо’ вадарць падвы’’, мадавытана’’ паныдо’, нюто’ паны, мальци’’ манэ’’лабтамба янамбовна нерня’ ядаць. Хусувэй’’ не’’ ембдяродо’ харто’ сэдырото’ сер’ сэдыбавыдонзь.
Тюнтава
Тюку похо’’на илебей’’ ненэй ненэця’’ тюнтаӈгова ялэдо’ ханярина мэць пиръядо’. Ты пэрти’’ яляхана няхар’’ мяд’ тер’’ тюнтаць. Ямална’’ ӈэвахана мэна ервава’’ няндо’ сава вади’’ хэтась. Няданда ӈуди’’ тер’’ ня’’маць. Ненэй ненэцяӈгат Михаил няби Любовь Яр ӈавхы иринати’ ила’ саир’’ сер’ ӈопой недам’ нёдалтаӈаха’. Ерв’’ няндо’ сейхад ӈэда вади хэтаць. Тарем’ маямба хэбидя ялям’ мэ’’ӈадонзь.
Ненэй няхаюна’’ ӈобнзер’ хынёси’’, сензӈэ илеяха’. Ниди’ хусувэй серкана нядабаяха’. Невхы иланди’ саирм’ нерня’ минреяха’. Тамна’ тяха’ нюхути’, нюти’ нюху’’ ӈадимдембамди’.
Ӈаврана’’ ӈавыдо’’ӈа’’
Мале няхаромдэй по’ Пэ’’ тер’’ сянакова’ яляхана ӈамзам’ ясьпа пирдырӈа’’. Тюку похона ю’’ ясьтана’’ варемдо’ мэ’’ӈаць. Тарця нюрцямд’ сырманзь товы’’ ӈокаць. Ӈамзидо’ етя пя хыди’’ ни’ ӈонабидонзь. Харад’ тер’’, мядонда’’ ӈобкана ӈаворӈаць.
Поӈгадандо’ хасавахат Павел Вэненго, Николай Тайшин, Семен Лаптандер нерняна мэць. Нехэт Вера Тоголя’, Ирина Неркаги’, Татьяна Лаптандер’ ясьмы’’ саваць. Хусувэдо’ нендумда’’мам’, есясавэй «сертификат»м’ ня’’мавысь.
Ӈамзам’ ясьпа ва’’лёй ненэй не, Татьяна Лаптандер лаханась:
— Мань Белоярскхад ӈадм’. Мале сидя по’ хабарталвахана манзарасетыдм’. Тоенанада яӈгу, нянани нензелаць. Небо’ ӈани’ пирдырӈадамзь. Си’’ми хаӈаць. Тедахав’ хар’’н сянакованзь таславась. Няхаромдэйӈэ ха’’мываць. Ӈудани терад таць.
Тарем’ Пэ’’ тер’’ яхана ӈопой мэвахана, хаер’’ нумгана сянакова’ ялям’ мэ’’ӈаваць. Ненэцяӈга’’на нюрцямзь.
Автор: Руфина Окотэтто’ падвы
Авторы
Няръяна Нгэрм
Темы