Няръяна Ӈэрм
Хобцокуда хонана’’ нивы’’ ӈа’’
Небо’ Тасу’ я’ няна «Хобцокодва’’ хохова’’» проектм’ ӈадимдець. Теда’ тикымдо’ тамна’ тяха’ минредо’. Тандая’ ёрти’’ мядо’’ хэвхана Надо-Марра, Саньков-Марра, Нямгудоче, Новенький’ няна «Искры очага» фестивальм’ мэ’’мэць.
Мякана ӈэвадёда’’ нива тябихутвандо’, мякы манзаяхатато’ хаця’’ юрвандо’ е’’эмня мякато’ ненэця’’ товэць. Поӈганандо’ Валерия Гутман (Тибичи) товы. Пыда падконда мюня ӈока мутрасавэй пя сянаком’ тэвравы. Ид’ вархана палёда’’ мяд’ тер’’ мал’ ӈопой ян’ ма’’лёвы’’, ямб толь’ ниня ӈэда хобцоко манэсармы’’. Ӈацекэхэ’’на, ӈарка ненэцяӈга’’на ёльце нюрцям’ ӈэвы. Пэдакабтёда’’ неняӈгахартахат юрхалмыд’’. Яляндо’ ханзер’’ хэ’’мям’ хамэдахарта нивыдо’ хамэда’’.
Проектм’ ӈадимдевы, музейхана манзарана тарця вади хэтась:
— Пяхад мивы’’ хобцоко’’ нензел’’мана ханяримна ядэлава’ пир’’. Район’ тиӈгэвна нюдяко’’ харда’’амна ядэлэян. Тамна Саляӈгардан’, Москван’ тэворӈаць. Ӈацекы’’ ӈэя’’, ӈарка ненэця’’ мал’ сянаковам’ мэнедо’, ӈобпирсавна хобцодо’ пюсетыдо’.
Ма’’нив, тарабта ӈани’’ район’’ нямна ӈани’ ядэла пиръяда.
Анна Яптик’ падвы
Сидяӈг: М.Яр’ тадтавы
Авторы
Няръяна Нгэрм
Темы