Няръяна Ӈэрм
Хойʼ неˮ еˮэмня ӈадимдевы закон
Вэбаʼ ирыʼ нюртей яляхана ӈаниʼ ӈобˮ саць тарана закон ӈадимясь. Мядʼ манзаи сертабадаˮ, тэхэˮна мэнаˮ неˮ нямна ӈа. Тад нерняʼ пыдоʼ минрена манзаяндоʼ тэнз законʼ ватовна тидхалевы. «Работник кочевого жилища» нюбета. Ӈахат тэри ты пэртяӈэ падыбасетыдоʼ. Тикыʼ нямна мале сян паднаваць. Тедаʼ ӈани тензебтехэнаˮ.
Выӈгана мэна неˮ манзаядоʼ ӈамгэхэртаӈэ нись толюˮ. Ты пэртяӈэ падвандоʼ мальӈгана пухуцяӈэ хэˮмяхадандоʼ пенсияӈэ яланда 13 ёнарˮ 511 есямʼ няˮмарпасетыˮ. Мядмʼ пэртяˮ неˮ нямна тандаяʼ няркана пэйдаць. Таʼ мальӈгана хамедадонзь, выӈгана тэхэˮна мэнаˮ ненэцяˮ несялмаˮ, пухуцидоʼ недбятна манзаядамдоʼ пюсь харданʼ сахамаˮ. Несипойˮ выӈгана илʼ яӈгода, хасава понʼ харта иле нида пиратˮ, мякана сита ӈатенада яӈгода. Тад ӈоˮ пирибтяˮ хоянʼ ниць харваˮ, выӈгы илаʼ нямна вададоʼ яӈгусь. Таремʼ ӈэбта мюсермаʼ илаʼ саирˮ пилиˮ яʼ сярˮ нид ёхода.
Едэй закон ӈадивоˮмамʼ саць понʼ тасламбидонзь. Ӈаниˮ ӈэрмʼ яхаˮна иленаˮ ненэцяˮ, невхыˮ иринатоʼ илаʼ саирмʼ нёданаˮ ӈаниʼ ӈатенаць.
Няхарˮ поʼ тяхана мюсермаʼ иламʼ ӈарка янаˮ тиӈгывна няхарˮ юˮ тет тэнзˮ сидя юˮ матˮ яхана минредонзь. Маняˮ округнаˮ Заксобранияхана тикы законмʼ мале сян нерняʼ пэрманʼ харвадонзь. 2017 похона неˮ минрена манзаямʼ «Об оленеводстве в ЯНАО» ватоʼ мюʼ падыбидонзь. Таʼ мальӈгана таремʼ серта яˮмадонзь, мядмʼ пэртя неˮ «чумработница» манзаямдоʼ ханяхартана законʼ серʼ нидонзь падыбюˮ. Совет Федерацияхартахана тарця манзаямʼ пуняʼ пэрӈадонзь. Тамна сидя поʼ хэˮмяхад ненэй ненэцяʼ няваˮ, сенатор Григорий Петрович Ледков пядась. Небоʼ вадамда мэць нерняʼ ӈадимясь. Таʼ мальӈгана «работник кочевого жилища» нюбета ватомʼ ӈадимдесь. Маˮнисяв: «Тодоˮ яхаˮна иленаˮ ӈэрмʼ терӈэ иле мэта мядонаˮ яӈгаˮ. Ханяӈынаˮ мядо, яранга, юрта мэˮӈаˮ. Законмʼ ӈадьбята таремʼ нюмдеваць».
Тикадоʼ вэбаʼ ирыʼ нюртей яляʼ, 2031 поʼ ӈэсондʼ ныхыда таняӈгу. Хусувэй хибяри мюсерта немʼ ни нядабюˮ, тикыʼ няюʼ ханяхавахана луцаʼ манзаяхана мэсь тараӈгу. Тарцямʼ нядˮмяць неˮ ныланаванзь ханаць пиртадоʼ. Лекарˮ мякана хаӈгурпатоʼ есямʼ няндоʼ салдамбаӈгуˮ, манзараˮмаˮ подоʼ миндаˮ, нюхуˮнатоʼ мэвадоʼ ӈаниʼ толёда. Мерʼ пенсиянʼ хэсь пиртадоʼ, ныланаваʼ ялэдоʼ таняӈгуˮ. Ӈопойˮ неры вадавнани закон нядаӈгованда еˮэмня ханяхавахана манзара тараӈгу.
Марина Ярʼ падвы
Сидяӈгˮ: Марина Яройʼ тадтавыˮ
Авторы
Няръяна Нгэрм
Темы