Няръяна Ӈэрм
Хома дяԓямтуӈ мэ᾿ӈаш”
Хомана ныптакуш», мянаԓяш». Каԓпюԓкана няматаԓакуԓма дяԓям мэ᾿ӈаш». Чики дяԓяхана ӈука» неша» ӈомаш». Выӈкат мэна» нешади» камна наӈича каԓтыхит» тота» мячинта» тадямэӈаш».
Мянаԓьш неша» дюԓнуӈ няӈат маньԓе чепьӈаш». Ӈайтаԓёта» поԓюԓитуӈ кӭшту», куптахаԓт ниш’мы шехеԓаймтоӈ маташтутоньш. Чуки похона хампԓяӈкдю» няхаԓ ты» канха”на няматаԓакуԓяш»: няхаԓдю» шеӭв касамай кан», матдяӈкдя — ней». Ӈайтаԓё матапёмытуӈ шехеԓайтуӈ кун- шича километраӈ дёԓьшаш. Ӈопумана ӈайтаԓёта» касами» поӈкна ӈайвахай каным᾿ Клим Пяк канаӈаташ. Нимимты местан Денис Айваседо ка’амдяш.
Няхамты местам Евгений Пяк канаӈаташ. Ни» поӈкна пиԓи меԓ, нята» неԓьня Ольга Дмитриева (Айваседо) тоӈаш. Ӈокна мансхаԓьш ӈайтаԓёчи» поӈкна ӈайвахай местам’ Борис Агичев канаӈаташ. Ӈайтаԓё мянаԓмантуӈ камна нешаӈи» нюӈк ӈаймямтуӈ конуԓпёш вяԓкуԓоԓяш», нэхэԓумпиш». Няԓяӈпаӈк вяԓкуԓпёш ӈайвахай местам Сергей Айваседо канаӈаташ. Нэхэԓумпючи» поӈкна Василий Пяк нэхэԓяш. Нешади» хомана нымтакомаӈ мэты куԓкаԓи» шеԓтаӈаш». Ӈыдихийтуӈ шеԓ Каԓпюԓкана дяконтуӈ ԓаӈкан ненэй мяту» ӈамтаӈаш». Мятутуӈ та’амна непудянтуӈ шеԓ ӈай мят дет ӈайта конкурсхана мянаԓяш». Неӈи» мятутуӈ мюй дёԓьше хома», дюпа». Писанатуӈ ниня куԓкаԓи» ӈамаԓ» тадяӈаш». Чикиӈ камна «Снежный» клубхана мансԓанна» ниӈвидяӈ дет ӈайта деты конкурс’ шеԓтаӈаш.
Кимяӈ ниӈвидяӈ хома ӈаймям манысаԓяш». Демьпчаԓутуӈ ӈычимчемпюта» тадямэӈаш, нешаӈ ватамана кынута». Паныдётуӈ меԓьмана хэтмы» ни», хомана шодёш кынумы» тотуӈ мячисы» ассоциацихит «Ямал-потомкам!» ня’амӈаш». Нешади» хыниԓмаӈ, дюньшиԓемаӈ мэты» Каԓпюԓкай клубхана мансԓанна» концерт’ ӈычимчеӈаш». Чикиӈ камна ӈашки’уди» маймаӈ мэты куԓкаԓи» шана’кохона» шана’куш». Каԓпюԓкана няматаԓакуԓма дяԓямтоӈ хомана мэӈатоньш. Тыӈ канхана ӈайтаԓё ӈайвахай местам᾿ канамы», шана’ко мянаԓьш нэхэԓмы» тотуӈ миԓита» мячисы» ня’амӈаш».
Андрей Пяк патмы
Авторы
Няръяна Нгэрм
Темы