Няръяна Ӈэрм
Хома шеԓ ӈычимты
Чуки похона мыԓичуӈ тэмстуӈ чадю нешайˮ дил нямна, деты хома шеԓ ӈычимты. Тат’ навэт Ӈэԓм’ чеԓˮ нешаˮ, ӈамсутатуӈ детхятуӈ каԓятатуӈ катамантуӈ мэт, шан’ патаԓ ниш’тоныˮ патанˮ.
Каԓиˮ дет ӈайта патаԓ патватмыӈ каԓиташтоныˮ. Няймы тэмстуӈ чадю нешайˮ дет тасԓёта ФАДН шеԓтамы Реестрхана нимитуӈ пачумаˮ таԓа. Таԓьшанта дякоп, нешиӈ патаԓшипëй ни’ каԓитан. Пуӈ дямпан шаӈок каԓиˮ ӈуп нешаӈ каташат, таԓьша шеԓоˮ диԓишатуӈ регионханатуӈ тасԓаштондятуӈ.
Чики неԓьня выӈкна, петаԓахана диԓинаˮ нешаˮ ӈамсутатуӈ детхятуӈ каԓятатуӈ катаман хапнантоӈ, неԓьшут патаԓтатуӈ паташтушˮ. Непоӈ Пюԓ дяханана дюԓкат ва’та чет’дюˮ нешаˮ таԓьша каԓиˮ патаԓ патӈашˮ. Мятачеԓˮ ӈука ӈайта нешаӈкна ӈукаˮ каԓяˮ таԓаˮ. Ӈамсутатуӈ каԓятатуӈ мэмантуӈ камна, нешаӈиˮ катамайтуӈ каԓитуӈ пеԓь ты”туӈ, вэдякутуӈ каԓят мэштутуӈ. Тат’ӈу выӈкна чуувна диԓина нешиӈ шадят таньше кусамэй пуӈ каԓиˮ патԓуˮ пытыпёты.
Таԓям патаԓ патватмыӈ каԓитама нянантоӈ хома. Кимя тэмстуӈ чадю нешайˮ дет тасԓёта Реестрхана нимта ни’ пычу, чики нешиӈ тамна понта шеԓ квотаӈ дет ӈайта патаԓ паташтоны. Таԓьша каԓиˮ патаԓт МФЦмана, «Госуслугиˮ ними’та порталмана неԓьшут Хаԓяӈкаԓтыхина ӈайта АПК департаментан ӈайтапта таԓаˮ.
Тат товнта похона каԓям катаман ха’таˮ, ӈуп диԓитуӈ кыди, таԓям патԓотоӈ меԓ шеԓташь таԓаӈаˮ. Тэмстуӈ чадю нешайˮ дет тасԓёта Реестрхана ними’туӈ пачутаˮ ӈай, ӈамсутатуӈ каԓятатуӈ катамантуӈ мэты, навэт шан’ каԓиˮ патԓуˮ ниш’тоныˮ патанˮ.
Лариса Айваседо патмы
Авторы
Няръяна Нгэрм
Темы