Няръяна Ӈэрм
Хома шоньшахана ныптакуш”
Чуки диԓиӈ кашемдючимты дяԓяхана каԓьтуӈ дяханатуӈ дискат диԓина» нешади» дет тасԓёта дяԓям «Международный день коренных народов мира» мэӈаш». Пуровский’ районхана шанат тэмс неша» диԓе», таԓям чики праздник’ ӈокна хома шоньшахана мэӈатоньш. Таньдет Каԓпюԓкана, Каԓясамэхэна, Самбуԓкахана, Таԓкахана шанат мероприятии» шеԓтаӈаш».
Кадяԓю нумкна хомана ныптаку». Таԓкахана чадю» нешади» тэмс дет ӈайта дяԓям «Прибрежный» паркхана мэӈатоньш. Таньняӈ ӈука тэмс неша» ӈомаш». Таԓкаӈ чеԓ» камна Каԓясамэхэт, Каԓпюԓкат, Самбуԓкахат мэна» неша» тадямэӈаш». Праздникан томы» хомана ныптакомаӈ мэты культурахана мансԓанна» куԓкаԓи» мероприятии» шеԓтаӈаш». Чики дяԓяхана культураӈ дет тасԓёта учреждении» чупей’ нятакуш». Праздникхана мэна» нешади» дюньшиԓемаӈ, хыниԓмаӈ, мэты» «Голос предков» нимита вильта концерт’ ӈычимчеӈаш». Кынута» шанат тэмс нешади» ватамана куԓкаԓи» кынсу» мэӈаш». Чикиӈ камна нешай» поӈкнатуӈ мянаԓмаӈ мэт ЦНКхана мансԓанна» деты конкурсу» шеԓтаӈаш». Чуки похона каԓьтуӈ ватамантуӈ стихотворении» мэта» «Мой язык -мой народ» нимита конкурсхана мянаԓяш». Хампԓяӈк мянаԓташ. Ӈаԓка нетуӈ поӈкна ӈашкиудехеԓ» стихи» вачаӈаш».
Чикиӈ камна праздникхана мянаԓта» ӈэпту» паӈкаԓпиш», каԓьтуӈ ӈутаханантуӈ шеԓтамайтуӈ ӈамыкутуӈ ӈычимчеӈаш». Конкурсан «Кочующий аргиш» тамытуӈ ӈамыкутоӈ дёԓьше меԓьмана шеԓтамайтуӈ. Мят дет ӈайта ӈамыку», ты», халакууди» — куԓкаԓи» выставкаханатоӈ тадяӈаш». Номинацихина «Стойбище будущего» Елисей Песецкий нэхэԓяш. «Традиции и быт КМНС» пиԓи хомаӈэ Кристина Ткачук шеԓтамы экспозицим’ тонԓаӈаш». «Семейный чум и нарта» нимита номинацихина Таисья Музыкантова ӈайвахай местан ка”май. Няхаԓ канкурсхана мянаԓмы», ӈайвахай местан ка”аммы» неша» тотуӈ диплому», веш дет ӈайта сертификату» ня”амӈаш». Чикиӈ камна праздникан томы» ни» мятукум ӈамтампё мянаԓяш». Кукинтуӈ меԓ меԓьмана мят мемам ӈычимчимпиш». Касама ӈупчики нюӈк ӈаймямтуӈ конуԓпиш», пы’тоӈ пай’кадя» матуԓмы» пи» ӈуп ниӈ ӈамтампё мянаԓяш». Праздникан томы» неша» Милена Казымкина шеԓтамы деты выступленим’ «К Солнцу» нимита маныдеӈаш. Ӈашки» шана’комаӈ мэт дета ӈайта площадкам шеԓтаӈаш». Ӈашкиуде» хомана майпиш», майпё пишвонутуӈ куптат хоӈаш». Куԓкаԓи» шана’кохона» шана’ко поӈкнатуӈ мянаԓяш». Праздникан томы» маньшту», таԓьша дяԓя тэмстуӈ чадю» нешаӈкна таԓа. Ӈокна таньше ныптакома хома. Ӈэԓм’ чеԓ» неша» нюсамэй тошту». Няӈайтуӈ нетуӈ, диԓюнатуӈ манэшту», каԓьтуӈ ватаманантуӈ поӈкнатуӈ мунушту». Чадю» нешади» тэмс дет ӈайта дяԓям Таԓкахана хомана мэӈатоньш. Чики дяԓя «Международный день коренных народов мира» няхаԓдю» пуӈ чеӈай, шеԓтамы. Маня» дяхана чики дяԓям шанат каԓтыхина мэштутуӈ. Таԓьша мероприятии» ӈаԓтана» ӈашки» де’эмня таԓа». Таньше Ӈэԓм’ чеԓ» нешай» диԓивсуӈ няӈ шеԓупанантуӈ, навэт каԓьтуӈ тэмстуӈ дилм, ватам, культурам нитуӈ дюԓан.
Андрей Пяк патмы
Авторы
Няръяна Нгэрм
Темы