Няръяна Ӈэрм
Хомана вильӈаш
Няхаԓ дяԓяӈ дямпан ныптакушˮ. Пуровскийʼ районхана ӈашки нешадиˮ дет тонԓюта фестиваль «Ягель» мэӈашˮ. Нешаӈ ватахана нимта «Нята». Ӈашки нешадиˮ ныптакома дяԓяхана поӈкнатуӈ мянаԓмантуӈ мэты Таԓкан шанат тэмс нешаˮ тоӈашˮ. Фестивалим каԓват камшуна, пяˮ поӈкна мэӈатоньш. Ягель мэсуматуӈ дятоӈ ӈаԓка, дямп ӈысыԓахаш. Таньняӈ ненэй мятуˮ меӈашˮ, шанат палаткиˮ ӈамтаӈашˮ. Матʼдюˮ четʼ командаˮ, ӈуп дёнаԓкат ваʼтаˮ участникˮ. Маняˮ Ямалхатна мэнаˮ мянаԓчиˮ камна ӈыди каԓват няӈат томыˮ тадямэӈашˮ.
Чики фестиваль Таԓкахана четʼты мэмаӈ шеԓтаматуӈ. Непой похот окружнойӈэ кадяш, чуки похона тадёмшей ӈаԓма. Ягельхана ныптакомантуӈ мэт дюˮ дёнаԓкат ваʼтаˮ нешаˮ тоӈашˮ. Фестивальхана мэниˮ ныптакомаӈ мэты ӈопшеԓ шича дюԓ мероприятииˮ шеԓтаӈашˮ. Ягель вильмаӈ мэты шаӈкмян организацииˮ, учрежденииˮ нятакушˮ.
Чуки похона ӈашки нешадиˮ ныптакома дяԓя дёԓьше хомаш. Няхаԓ дяԓяӈ дямпан мянаԓтаˮ командаˮ шанат конкурсханаˮ мянаԓьш куԓкаԓиˮ ӈамыдюˮ ӈычимчеӈашˮ. Ягельхана хомана вильӈаш. Неԓьчеэй дяԓяхантоӈ фестивалян томыˮ таԓьша конкурсхана «Визитная карточка», «Квартирник в лесу» мянаԓяшˮ. Мянаԓтаˮ мятутуӈ ӈычимчеӈашˮ, куԓкаԓиˮ ӈамаԓˮ пиԓимамтуӈ. Маняˮ Ӈэлмʼ чеԓˮ неша ненаˮ Каԓпюԓкат, Каԓясамэхэт, Таԓкахат мэнаˮ ӈупчики фестивальхана куԓкаԓиˮ ӈамэхэнаˮ мянаԓяшˮ. Четʼ командаш. Каԓпюԓкат мэнаˮ шича командатоньш — «Харвэй», ними детскийʼ садикхана мансԓаниˮ шеԓтамы команда «Росинка». Каԓясамэхэт мэнаˮ нешаˮ командантуӈ ним «Романтик», Пуровское ОД КМНС «Ямал-потомкам!» командатоӈ «Северяне» нимиӈаш. Ӈашкиʼ нешаˮ поӈкнатуӈ мянаԓмаӈ мэтыˮ шанат конкурсˮ, площадкиˮ шеԓтаӈашˮ. Куԓкаԓиˮ тадяӈашˮ. Куше грант патмам, куше чикимта хомана вачамам — таԓьша шеԓуˮ тасԓампё ӈашки нешадеˮ таньдет томыˮ ԓусаˮ тохоԓампюдятоньш.
Грантʼ дет мичиԓпёчитуӈ вештоӈ ӈопшеԓ няхаԓ миллионʼ ӈок. Таньше мянаԓмыˮ поӈкна маняˮ Пуровскийʼ районхатна мэнаˮ тадямэӈаˮ. Няхаԓ дяԓяӈ дямпан мянаԓтаˮ нэхэмтуӈ, нюӈк ӈаймямтуӈ конуԓпёш шанат ӈамэхэнаˮ шанаʼко мянаԓяшˮ. Ӈын мэш кансмана дяттоԓмамтуӈ конуԓпишˮ, посканхана дяттоԓьш пейнтболхана шанаʼкушˮ, ӈаԓка паныдяай мэш сумболхана мянаԓяшˮ, токушамна ваԓьӈаноханаˮ ԓапяташ мянаԓяш. Мянаԓмыˮ ӈашки нешаˮ, хыниԓмантуӈ мэт таньняӈ томыˮ — чупей хомана ныптакушˮ. Шанат мастер-класс, тохоԓко мэтаˮ, ӈашкиудиˮ шанаʼкош мэта площадка — куԓкаԓи вильтаˮ ӈамыˮ тадяӈаш.
Таԓьша мероприятииʼ ӈашки нешаӈкна, ӈаԓка нешаӈкна таԓа. Наӈича каԓтыхит томыˮ нетуӈ коштуˮ, шанат тэмс нешадиˮ манэштуˮ, поӈкнатуӈ мянаԓьш шанаʼкоштуˮ. Фестиваль няӈ каймян хаʼтаˮ автобусхана кӭштуш, таԓьша машенʼканʼ няхаԓ дяԓяӈ дямпан дятыԓяш.
Андрей Пяк патмы
Таттама: Андрей Пяк таттамы
Авторы
Няръяна Нгэрм
Темы