обновлено: 09:04, 16 октября 2024
Няръяна Ӈэрм
Хынокад не нида тохоламбись
Няръяна маркана сё мэта ненэця’’ этнокультурной центр’ мякана няхар’’ яля’ ямбан’ сё мэць тоходанаць. Пыдо’ округна’’ ӈэсыхыт товы’’. Искатель ӈэсыхыд, Краснойхад, Варандейхад, тамна ӈани хардахат ансамбль’ тер’’, хынокад не’’ тохолкованзь округна’’ еркы март’ ма’’лыць.
Хусувэй сидя по ваерась яханана’’ «Сава сё» конкурс ӈэсеты. Тикамдо’ сидя юд по’ няю’ минредо’. Тарця конкурсан’ хамекова’ сер’ тамбир’’ семинарм’ хамедаць. Сидто’ Татьяна Нюдихасововна Лар — Ямал няд товы юнета нява’’ тохоламбись.
Няхар’’ яля’ сер’ Ямалкад товы, сё мэць я’’авлада, харта’’ сё’’ падыбада не Няръяна маркана манзарась. Татьяна Нюдихасововна — ненэцие’’ невхы сё теневана. Ӈыхы сэвта сыло’’махад хыно’’ӈа. Ямал’ выӈгана нисяда Нюдихасава Худи хыноць теневана ненэць’ ӈэвысь, невхы хынабц, ярабц няданда намдормыда. Татьянам’ хайнана сё мэць тохолавэда. Теда’ хынокад Худейм’ ханярина теневадо’, харта сёда падыби, сеянда явом’ хусувэй сёхота ха’’аврамбида. Хари’’ янда, ӈэрм’ тер’’ нита нямна лахана. Теневабцомда вадёдана илебей няхата тэврамбида.
Ӈока по’’ ямбан’ ненэцие’’ хынабц, ярабц, сюдбабц, тикахад сёсавэй’’ вадако, лаханако ма’’ламби. Хусувэй ма’’лавыда ӈобт’ пэръяда, падарт’ падыбида.
Татьяна Лар’ табеко’’
Ваеравы сян яля’ ямбан’ хынокад не Няръяна маркана манзарась. Маня’’ яханана’’ сёётэй няхата теневабцода ваде’’манзь тэворӈась. Ненэй ненэцяӈг’’ невхы ил’ ватом’ манэ’’лабтамбись, ӈыхы похот няна’’ тэвавы хынабц мэ’’ӈась. «Ӈэрм’ яхана илена’’ хибяри’’ сё’’ мун’’ ӈани’’ тэнз’’ ненэцяӈгат яӈга’’, маня’’ хар’’на’’ мунона’’ таня’’. Хыно’’махана тасламба тара», — Татьяна Нюдихасововна мась.
Ӈадьбята тохолковахана тарця сер’ нямна яӈга лаханась. Хыно’’мандо’ мальӈгана манэ’’лабтамбасетыда, ханзер’’ хурка сём’ мэць тара. Ӈавнанда ненэця’’ янамбовна сёдо’ мэцетыдо’, ӈаркавна нивы’’ хынос’’. Теда’ ӈани’ сер’ миӈа’’. Ӈаркавна, мандалӈэ хынота’’ ӈадимя’’. Тарем’ хыно’’махана харто’ ватодо’ ӈадиберӈа’’. Тикым’ ӈани’ тенева серо’’ӈа.
Сидя яля’ ямбан’ сертавэдо’ ӈокась, едэй сё’ саирм’ ханзер’’ минревам’ нина’’ намдаць. Хыно’’ӈаць, манзаито’ нямна лаханаць. Тикы’ пуд си’’ив пудана яляхана ӈамгэн’ тоходанавамдо’ манэ’’лабтамбидонзь. Хусувэдо’ харта сёмда мэ’’ӈась, ӈобкана мэ’’мы сёдо’ манэ’’лабтаць. Татьяна Лар харта падвы сёда мэ’’ӈась. Хыно’’ма’ ёльцяӈгана ханзер’’ индм’ нэкалпась серо’’ӈа, тикы’ нямна тохолковам’ манэ’’лабтась. Таняна мэвэӈэ мал’’ тоходанаваць.
Сидяӈг: Ю. Талеева’ тадтавы
Ю. Талеева’ падвы
