обновлено: 05:27, 26 июля 2026
Няръяна Ӈэрм
Илаʼ саироˮ хари тохоламбадаˮ
Неняӈгʼ ирыʼ юкад вата сибимдей яляхана маняˮ яхананаˮ илаʼ саироˮ хари тохоламбадаˮ ненэциеˮ ӈарка яля. Тарця манзаямʼ минренаˮ ненэциеˮ пэртиˮ сероˮ хари Салехардахана ӈэда музейхананаˮ ӈацекэхэˮ вадеˮядонзь.
Хуркариˮ ненэциеˮ поӈгана илаʼ саироˮ хари тохоламбадаˮ таняˮ. Тикыˮ ненэцяˮ луцаʼ вадавна манзь «этнограф»ˮ. Тарця манзаямʼ минренаˮ яʼ сярʼ нимна хуркариˮ ненэциеˮ тэнзˮ ханзерˮ, ханяна илевамʼ тохоламбиˮ. Манэˮмыˮ серодоʼ падыбидоʼ, тасламбидоʼ, вадеˮядоʼ. Тикы серˮ харта явна минда наука — «этнография». Маняˮ яхананаˮ тарця манзаямʼ минренаˮ юнетаˮ ненэциенаˮ таняˮ. Пыдоʼ илнаˮ саироˮ хари тохоламбиˮ, ӈани яʼ ненэцяӈгˮ ханзерˮ илеваваˮ вадеˮӈадоʼ.
Ямалʼ яханана харˮнаˮ ӈарка музейваˮ таня — «Окружной музейно-выставочный комплекс имени И.С. Шемановского». Иван Семёнович Шемановский хэхэʼ мядʼ манзаямʼ минревы, тикавнананда Иринархм нюбеˮмы. Тюку яхана манзараванда серʼ ӈэрмʼ терˮ ненэциеʼ илмʼ тохоламбавы, нядаӈговы. Тикы ӈарка ненэцьʼ маняˮ яхананаˮ нерденяӈэ падармʼ тохоламбади тидхалембавы. Ӈобтʼ маˮлавы ӈамгэхэтата 1906 похона музеймˮ сертавы.
Этнографʼ ӈарка яляʼ едʼ музейхана манзаранаˮ ӈацекыˮ няʼ тикы яляʼ нямна лахарю мэˮӈаць. Харта янда нямна мядондита теневабцу намдуванзь Нелли Сергеевна Гоглоева викторинавна хонаркусь.
Оксана Николаевна Окотэтто товы няхата ӈэрмʼ терˮ ненэцяˮ ханзерˮ мядонди ядабтамбавамʼ вадеˮӈась. Сяноковандоʼ серʼ ӈарка яндоʼ нямна ӈэда сё Елена Олеговна Поплавскойʼ ня мэˮӈаць. Тикытоʼ пуд тадтаˮми ӈобтʼ тидхалембиць. Ханзерˮ этнографʼ падмʼ маˮламба таравамʼ Ирина Викторовна Прохороваʼ ня вадеˮӈадонзь. И.С. Шемановскойʼ нювмʼ нюбета музейʼ манзаранахат ӈока сава ӈамгэмʼ намдаць.
Ӈацекыˮ сяхариʼ намдавыдоʼ тенеӈгудоʼ. Ненэциеˮ илаʼ саироˮ хари тохоламбадаˮ нинаˮ вадетаˮ хусувэй хибя илаӈгананда, манзаяханда тарояда.
Нюдяне Махакуйʼ падвы
Сидяӈг: Алла Вануйтоʼ тадтавы
