Няръяна Ӈэрм
Иламдо’ сёхона салмрамбидо’
Ты пэртя’’ Сянакова’ яляхана сёбар’’ пирдырма’ хавна «Кочевая семья» конкурс ӈэсеты. Тюку по’ Нядаӈгардан’ сидндет мяд’ тер’’ мандал’’ товыць. Пыдо’ округна’’ тодо’’ си’’ив яхад ӈаць.
Пирдырмадо’ сидя яля’ миӈась. Сянакода’’ ненэцие’’ ирмня няндо’ сырӈаваць. Пихий сцена’ ниня ембдяродо’, мэта ӈаворидо’ манэ’’лабтамбиць. Невхы иринато’, хаданато’ сё мэ’’ӈаць. Ханяд товамдо’, хибя ӈэвамдо’ ваде’’ӈаць. Не’ ханодо’, харе’’ ӈудаха’’нато’ сертавы ӈамгэридо’ ӈадимдець. Сыртаӈэ маня’’ сэврина’’ ӈэнадаӈгаць.
Ӈопой мяд’ тер Салиндер еркарм’ мэ’’мыць. Тасу’ я’ Паюте’’э’ харад’ выӈгад ядэрмыць. Хой’ нямна мюсерта’’ ненэця’’. Не’ хандо’ хэвхана мэвахандо’ ядабтэйнась. Небямдо’ лаханако ня’’ӈадамзь. Нонна Владимировна тарця вади няни мэ’’ӈась:
— Хэбидя ялян’ мат’’ӈэ товаць. Ӈани’’ нюни’’ ниць ту’’. Хасава нюми тыда манзая’’ӈа. Ӈарка не нюми хаюпи. Ӈани ӈопой не нюми Тюмень маркана иле. Тохолко’’мамда мале’’мяхаданда таняна манзара пэяць. Техэ яхадана’’ пон’ миӈаваць, ява’’ ёльце хубта. Тальня’ машинахана тэвынаць. Ява’’ Ямбург’ хой’ няюна харахана ӈа. Нядаӈгардахаван’ ӈоб’ тэворцетыдм’. Няхаромдэй’ пирдырманзь тодм’. 2018 похона мя’’ни тер’’ ня’ нюртейваць, тедахав’ хурка ӈэбцу.
Сёётэй мяд’ тер’’
Нонна Владимировна сё мэць ӈули’’ теневавысь. Сёда ӈод’’ харта падыбида. Ӈопоймда намдавась, порцам’ пирембава’ нямна ӈась.
— Сёми хар’’н падвэми. Та’ ӈэдалёванд сер’, ӈамгэхэв ӈаварм’ пирембаванд сер’ ханяӈэхэ’’на ихинд хайнана’’ вада’’ ха’’маӈгуд’’. Ядэро’’мини’’ пуд харвобта едэй сём’ падӈгодакэдм’. Тарем’ ерембата тикыми тамна Новой Уренгойхана мэтнакэв. Тарця ӈэсетынё’’: сыртан, сыртан ӈамгэ’ пиркана сёкоцям’ ханаӈгун. Нюдяко не нюхуртами Юннеми си’’ни’ тотрев’ хыноцеты. Нябими Лилия. Ӈопойдо’ — Виталина. Нядаӈгардахана ӈацекы тохоламбадаӈэ тохолкурӈа. Тохолкованда хавна тара. Пуна сцена’ ниня мядонда’’ е’’эмня тараӈгу, хынота.
Мяд’ терсавэй’ мал’ ӈобнзер’’ ӈани’ хыно’’ӈаць. Мэ’’мы сёмдо’ харто’ падвэдонзь. Хыно’’мандо’ нерня вэсакода Иван Яковлевич мась:
— Ӈавна ӈобт’ 1996 похона тэвынинзь. Теда’ ӈобкана няхар’’ ю’’ по’ илени’. Тюку по’ «Жемчужная свадьба»м’ мэ’’ӈани’. Пухуцяни ня’ си’’ив нюм’ ваданинзь. Ханяӈыдо’ харто’ мяд’ терсавэй’’, нюдякудо’ тамна школа-интернатхана тохолку’’. Выӈгана иленина’’, харад’ илам’ минренина’’ таня’’. Сямян манзаям’ ӈобнзер’ сертабива’’, нина’’ етри’ нядабина’’.
«Мюсерта’’ мяд’ тер’’» пирдырмахана хибямдо’ нерня’ мэвамдо’ хэбидя яля’ малева’ нерцю’ намдаваць. Салиндер еркарм’ мэта’’ нина’’ нябимдейӈэ таславыдонзь. Нядаӈгардан’ мядоманзь товы’’ ненэй ненэцие’’ нямна намда’’. Хуркари мел’’мана сертавы ембдяро манэ’’ӈа’’, хайнана сёхо’’ инзеле’’.
Автор: Анна Яптик
Авторы
Няръяна Нгэрм
Темы