обновлено: 08:41, 16 октября 2024
Няръяна Ӈэрм
Иландо’ саирм’ нёдана’’
Хор’’ иры’ нердена ялэ’’ пиркана яля’ падаркана ӈоб’’ ненадо ялям’ ядабтамбаӈгува’’. Тикава’’ яхад ӈавыдота ӈавар вадабади’’, хорови, тамна ӈани’’ нуво’’ сармик вадабади хэбидя яляӈэ таславы. Маня’’ ӈод’’ ты пэртина’’, халяданина’’ тикы’ няю’ ёльце ӈарка таром’ ха’’аврамби’’.
Ямалханана’’ ӈарка яна’’ сяр’ ниня тэва’’ сямянхат ӈокаӈэ толы. Невхы иландо’ саирм’ нёдана’’ ӈокадо’ — ненэй ненэця’’. Харе’’ тыдо’ пэрӈа’’, невхы иринато’ недарми нёда’’. Тарем’ ӈобкана округна’’ ед’ ёльце ӈарка таром’ ха’’аврамби’’. Совхозна’’ тамна таня’’, ӈока хибя’’ общинаха’’на манзаранаӈэ толы’’.
Пудана по’’ ты пэрма’ нямна ӈока сава серо ервона’’ ӈадимдець. Ямална’’ тиӈгывна ненэцие’’ недарми’’ ниня хабарталва’’ ӈадимя’’, ненэця’ сян ӈыхы ян’ тэмда нида танабаӈгу’’. Мюсеванда сер’ лакри’ ёльцяӈгато’ тэвавы тыда тэвраӈгуда. Тарем’ харе’’ есядамда недвота. Тюку та’ ӈамза’ мирм’ ӈокамдадонзь. Хэвада сава ты’ ӈамзам’ самляӈг юр’’ есявна ня’’марпидо’. Ӈахат тет юр’’ самляӈг ю’’ есясь. Хэвада вэварка — мирцярка, ӈахат юр’’ самляӈг ю’’ есясь, теда’ сидя юр’’ самляӈг ю’’ есяӈэ хаясь. Ты пэртя ӈока вадам’ пена’’ нямна мэцеты’’, тикамдо’ ӈани’ помнандо’ таславэдо’. Тыдо’ хабарталвахана хабарпабато’, тарана прививкасавэй’’ ӈэбато’ серо’’ӈа.
Хахаяда яля’ «Ярсалинской» совхоз’ ерв Александр Соокович Сэротэттом’ лаханако ня’’ӈадамзь. Пыда ма’’нисяв:
— Ты’ илам’ лэтравана’’ е’’эмня хойхана не’’ тянё. Несипой’’ ты’ илам’ ётава’’. Вэсакохонато’ мюсерта’’ мяд’ не’’ недбясавэй ӈэбато’ тара’’. Тарця ӈэбата, не’’ хардан’ ни сат’’. Хасава’’ таӈга ты’’ иламдо’ нёдаӈгу’’. Ӈока по’’ тикы’ нямна лаханава’’, тедарихив мань ӈэсыхынани несьда хасавами тет юкад ва’’ӈа. Тикыд ваднандо’ хэвдамдо’ нибато’ ху’’, ӈани’ хардан’ тэваӈгуд’’.
Халядавахана маня’’ ӈэрм’ тер’’ нина’’ ӈани’ ӈока’’. Тюку ялэ’’ пиркана серона’’ нензел’’ ни ӈа’’. Ненэця’’ планадо’ томдабабато’ ӈод’’ ханяӈэхэна ӈарка серк’’ ереберӈа’’. Хахаяда яля’ «Ямал-нюна’’ я!» Ассоциация’ съезд ӈэва’ мальӈгана Горнокнязевск хардахад ядэрта не халям’ хадабади’’ ил’ хурка ӈэвам’ хэтась:
— Халям’ хадабада’’ хусувэхэт тоса манзара’’. Сяхаринда сидна’’ я’ ниня илена ӈаво лэтамбада’’ ня’’марпи’’. Палкурм’ ватабава’ мальӈгана поӈган’ идюрця’’ ереберӈа’’. Идюрця халя ерембата, ма’’ним’’: «Нёйда’’ ханабю’’!» Тарем’ таслаб’’, хар’’на’’ халява’’ сусадамбива’’нё’’. Таддикахад халяна’’ мир’’ тянё, ня’’марпада недбява’’ ӈодь’’ товорӈа, недбяна’’ сяӈок ӈэвам’ манзаядава’’ тавы нява’’ харта тасламбида. Халям’ пэртина’’ есяси’’ хаюрӈа’’. Тикы’ хавна манзараванд сер’ ня’’амларабат есям’ харт салдаӈгур. Ӈанона’’ тима’’, подо’ юкад ва’’ӈа’’, неновна ялэхэ’’ мэта ӈано самляӈг по’ пирт’ пере пэрӈа.
Е’’эмняндо’ таславы хэбидя яля ӈэбата ӈод’’ тедари’ ты пэрмахана, халядавахана нензел’’ ил’ яӈгу. Хусувэй ӈамгэм’ саць тоена нерня’ пэрӈадо’. Тарем’ ӈод’’ ӈэрм’ тер’’ ненэциена’’ пуня’ ни’’ ӈа’’. Невхы иринато’ минревы манзаямдо’ тамна’ тяха’ пэрӈадо’.
М. Ярой’ падвы
