Няръяна Ӈэрм
Илебей ненэцяˮ ӈаниʼ ӈобтʼ маˮлыˮ
Ӈэрмʼ терˮ илебей ненэциенаˮ ӈаниʼ ӈобтʼ маˮлыˮ. Тедаʼ Новой Уренгой маркана нидоʼ ядабтэйдоʼ. Ӈокханда таняʼ Ӈарка Россия янаˮ тиӈгы ёˮ няд няхарˮ юˮ тэнзˮ сертовыць. Пыдоʼ няхарˮ юˮ самляӈг яхана илеˮ. Сямянхат ӈокадо ненэй ненэцяˮ. Ханяӈыдоʼ тамна школахана тохолкуˮ. 14 потнаˮ мале таняна мэсь пирӈадоʼ, сямянхат ӈаркамбойˮ нитоʼ 35 подоʼ. Няхарˮ яляʼ серˮ «Российский Север» форумамдоʼ мэтаˮ.
Пудана мале сян поˮ тикы сертоʼ яхананаˮ, округхананаˮ минресетыдоʼ. Салехардахана ӈэсеты, тюку поʼ нердена яӈорэйʼ Новой Уренгойхана маˮлыˮ. Сертавандидоʼ саць яӈгамдавыдонзь. Ӈэрмʼ терˮ яʼ тебтмʼ нэкалпадиˮ няʼ поёдоʼ сава ӈэваʼ няюʼ минредоʼ, Тикыʼ хавна илебей ненэциеˮ организацияˮ нерняʼ пэртиˮ нямна лаханаӈгуˮ. Тасламбавандидоʼ няхарˮ янʼ тярмы: «Сила традиций», «Энергия развития», «Путь к единству», тарцяˮ нюбе мэˮӈаˮ.
Малʼ ӈэбатоʼ хартоʼ яханатоʼ манзараˮ. Вадидоʼ нерняʼ минреˮ, мирдаӈгурӈаˮ, ӈацекы тохоламбиˮ, сёбарˮ, тамна ӈаниˮ таранаˮ серо пэрӈаˮ. Ханяӈыдоʼ форуманʼ хуркариˮ проект тэвравыць. Нерняʼ хаˮамбабатоʼ, недвоˮмыˮ есяхаˮнатоʼ яханатоʼ таславыˮ ӈавэдоʼ тидхалембаӈгуˮ. Тарця форумхана сяхаринда нядˮмаʼ есь тамбиˮ. Таремʼ небоʼ Тасуʼ яхана ненэй ненэциеˮ школахана лаханако манэˮлабтамба пяць. Тамна ӈанидоʼ ӈэрмʼ терˮ иламʼ нерняʼ минреваʼ няюʼ ӈока ӈавэ тидхалеванзь есь нэкалӈаць. Тедаʼ хибя нерняʼ хэвамʼ пудана яляхана вадетадоʼ.
Нерденаˮ поˮ форуманʼ ядэрмэхэт юкад вата ӈобˮ поʼ серʼ ханяӈыдоʼ ненадо ӈарка ненэцяӈэ хэвыˮ. Тедаʼ пыдоʼ ӈамгэʼ тоˮолха серо минревамдоʼ ӈадимдембаӈгуˮ. Ханяӈыдоʼ сайнормаʼ, сёбарˮ, паднаваʼ сермʼ, мядондиʼ манзаяˮмамʼ, илаʼ саирмʼ лэтравамʼ, хареˮ вади нерняʼ минревамʼ вадетаˮ. Таремʼ ӈаркамбойˮ няхатоʼ сыраць илебей ненэцяˮ яляʼ няюʼ енаӈгуˮ.
Ӈока вадамʼ ӈэрмʼ терˮ иламʼ нерняʼ минреваʼ нямна мэтаˮ. Сессиядоʼ няхарˮ янʼ тярмыˮ ӈэӈгуˮ. Тикы няюʼ ӈэрмʼ терʼ илаʼ нямна манзаранаˮ политик хамыць. Пыдоʼ ӈобтикы тодоˮ яхат ӈаˮ. Ӈамгэʼ тоˮолха ватоˮ танявамʼ, ханзерˮ тикыдоʼ тидхалембавадоʼ илебейˮ ненэцяӈгˮ вадетыдоʼ. Форумхана мэнаˮ тэри инзелевандаˮ ниˮ ӈаˮ, харто индоʼ ядэрабцо ӈаниʼ ӈадимдембаӈгудоʼ. Ханзерˮ илебей ненэциеˮ организацияˮ нерняʼ пэрмамʼ яӈга тохоламбаӈгудоʼ.
Тет яляʼ пиратʼ Новой Уренгой ӈэрмʼ терхат панта. Илебей ненэцяˮ таӈок яляʼ серʼ ӈока сава иʼ ӈу намдаӈгуˮ, пуна иландʼ тэврамбаӈгудоʼ.
Автор: Марина Ярʼ падвы
Авторы
Няръяна Нгэрм
Темы