Илебей ненэцяˮ лаханаˮ

Ӈарка пэвдей ирыʼ юдимдей яляхана округнаˮ ӈарка сояˮмаʼ ялямʼ ядабтамбиваˮ. Ямалнаˮ 95 поданда хая. Таӈок поˮ ямбанʼ маняˮ ненэй ненэцяӈэ илмаˮ сава няюʼ саць яӈгаˮма. Тикымʼ ӈарка ненэциенаˮ саць сававна хамедамбидоʼ. Тедаʼ вадамдоʼ илебей ненэциенаˮ мэтадоʼ. Пыдоʼ илмаˮ тамнаʼ тяхаʼ минревандаˮ. Индоʼ ядэрабцоˮ нямна хонрамбинаць. Пыдоʼ хэбидя яляʼ едʼ сейхад ӈэда вади хэтаць.

Тедариʼ тамна тохолкурӈа

Виолетта Вануйто Новый Портхана, сидндетимдей классхана тохолку. Хуркариˮ пирдырмахаˮна мэсеты. Неноховавна математикамʼ харвобта. Стихотворения ненэй няби луца вадавна падыби. Лаханако, ӈани хуркариˮ илекавна падвы ненэй ваданʼ тэвˮрамбасеты. Юкад вата ӈопой классмʼ малеванзь тасламби. Таддикахад ӈарка мартʼ тидхалё тохолкованзь ханда. Округнаˮ 95 поʼ едʼ инда ядэробцо таремʼ хэтыдась:

— Маняˮ тохолкодаӈэ сяхаӈгавʼ Ямалнаˮ еˮэмня тараӈгуваˮ. Хусувэваˮ варемда мэˮӈая. Тамна ӈокаˮ хуркариˮ едэйˮ мутраˮ ӈадимдаˮ, тикыʼ тохоламба тараӈгуˮ. Ӈэрм яваˮ, илнаˮ саирмʼ, вадаваˮ лэтрамбахаваˮ. Ненэциенаˮ ӈобанзерʼ хынёсиˮ илеяˮ.

Ненэсянда вадёданаˮ ӈацекыˮ поӈгана нерняʼ ӈэдидоʼ, тохолко ваˮлёйдоʼ таняˮ. Нидоʼ няндоʼ сыраць ӈаниʼ варемдоʼ мэтаˮ. Тарцяˮ няхатоʼ енаӈгуˮ.

Руфина Окотэттоʼ падвы

Авторы

Няръяна Нгэрм

05:31, 17 декабря 2025

Темы