обновлено: 04:04, 28 ноября 2024
Няръяна Ӈэрм
Илма’’ няданда пере
Носиндалава’ иры’ пудана ныланава’ яля’ сямянхат ненадоӈэ толы. Тюку по’ «День матери» сидя ю’’ тетимдей ялян’ ха’’мы’’. Хусувэй ненэць’ соя’’махаданда нюртей хэтвы вадада «небя» ӈэсеты. Небянана’’ иландана’’ тамби’’, сидна’’ мэне’’, сяӈа’’, сяхаринда хэвханана’’ мэ’’. Сянри пона’’ ӈэб’’ ӈод’’ нянда етри’ паромбива’’, пыда табекоримда намдаван’ харвава’’.
Тарця хэбидя яля’ ед’ яна’’ тиӈгывна илена’’ нехэ’’, ӈацекы вадабадаха’’, нюдо’ вадавэхэ’’ сямянхат сава вади ӈэдарамбидм’. Неновна выӈгана мэна’’ не’’ нямна вадами ханаван’ харвадм’. Хой’ няна ӈоб’’ ёльцяӈгана пэрта манзаядо’ саць ӈока. Хобатна’’ ӈацекыдо’ пэрмандо’ хавна мякы’’ серодо’ таня’’. Нянандо’ мюсе, мэята, сэдора, ӈаварм’ пире, идм’ хосая, поёрць тара. Ненэй не харвабта пи’ хонёвдавэй ӈэӈгу, хубтахана тарем’ ӈод’’ яля’ сэв нерцю’’ юркаӈгу’’, тумда пятаӈгу, мята тер ӈавлаӈгу, вэсаконда серуванда ӈамгэри хамэдаӈгу. Ӈамгэри’’ тецьда’’, ядембада’’ нув’’ ӈэя’’, тэхэ’’на илена’’ не’’ тэри мэвахад ӈоб’’ ехэра’’. Малко тарабта — малкода’’, поӈгам’ вата тарабта — ватаӈгованзь ханда’’, буранм’ мэць тарабта — ӈани’ пирӈадо’. Тикахад пэдавадо’, ныланаван’ харвавадо’ ни ӈадяӈгу’’: пыдо’ хусувэхэт высылпэй’’, илебяды’’, сёнзито’ мюй’’ лата’’.
Мат’’ ню’ небя
Мань небями Яптане Таютовна ӈани’ ты пэрти’’ мякана соясь. Панаевск’ выӈгана матдомдэй ӈэсыхына вадысь. Пыда няхатата ӈаркадо’, сидя не няхаюда, хасава няда пуданда миӈа’’. Теда’ пыдо’ мал’’ ӈарка ненэця’’, харто’ мяд’ терсавэй’’. Хусувэндо’ харта иланда сехэры: хардахана мэнидо’, ты’ илам’ тэравыдо’ таня’’.
Мамами самляӈг ю’’ тет по’’ тяхана школан’ хаясь, ю’’ классам’ ёльцесь. Ӈули’’ сававна, тид’’ тохолкусь. Школа’ пуд тамна’ тяха’ тохолкованзь хаясь. Ты’’ мякана вадёвы не ӈацекы ялэхэ’’ нибям’ ня’’амбавы. Тарем’ янамбоковна ӈухуку’ паным’, нив’’ ӈэсям’, ӈоба’ ня’’авм’, пива’ ӈыладм’ сэдыба тоховы. Теневабцода ӈокамдамба Си’’ив харвхана сэдорани’’ манзаям’ училищехана тохоламба пявы. Сидя по’ хэ’’мяхад сита Ноябрьск хардан’ ӈэдаравы’’, таняна практикам’ мэ’’мы. Пуна харта яханда тэвавы’’, культура’ мякана манзарани’’ имбытадод сэдыбавы. Тикэнда пуд выӈгана иле пэвы’’.
Ӈавнанда Хорэли’ еркарм’ мэ’’ӈась. Хаюпа хэ’’мяхаданда Ябтикыӈэ хаясь. Тамальӈгана нисяни ня’ самлянзимдей ӈэсыхына манзараӈаханзь. Ӈопой илам’ пя’’махаданди’ ӈацекыди’ сояць. Маня’’ ӈобтикы ненэй мякана вадёвэва’’. Теда’ нюдяко нярива’’ пудана по’ школахана тохолку. Ӈанихиваӈэ мале мал’’ манзарава’’, хар’’на’’ яхана’’ таром’ минрева’’. Хусувэва’’ ихинанда пойда сертамда тэрась. Ханярина илеб’’на’’ ӈод’’ ӈобт’ ма’’люрцетыва’’, нина’’ иле’’мяхат ӈоб’’ теневасетыва’’. Хар’’на’’ нина’’ няд’’маӈэ, мэйра’’маӈэ тарасетыва’’.
Пармдана’’ тараӈаха’
Небяхаюни’-нисяхаюни’ тедалахана’ невхы иланди’ саирм’ нёдаӈаха’. Нюди’’, нюти’’ ню’’ мяканди’ сяхаринда тэворӈа’’. Пыди’ иланди’ ямбан’ манэ’’мэди’, тоенана серм’ пирдалевэди’ ӈока, сямян ӈамгэм’ теневаӈаха’, ӈамгэри ӈамгэхэна ниди’ нядабихи’. Няна’’ мэта’’ табекуди’ ёльце сава’’ ӈэсеты’’, ӈобаӈгэв’ яля’ няю’ сидна’’ тидхалембасетыхы’. Ӈадьбята сидти’ тотрев’ нерняри’ ӈэван’ харвава’’. Тасла я’’мана серт танябта сит табедаӈгуху’, етри’ хэвхананд мэӈгуху’, ныхыдамд тамбадарахаха’ ӈэӈгуху’.
Тедари’ небями, нисями выӈгана мэӈаха’, хардан’ тамна турмадавэйха’. Тюкохона мэвы ӈэхэвабти’ иле’’миди’ лаханакодарев’ вадетыдинзь. Нянди’ торовам’ ӈэдарамбидм’.
Анна Яптик’ падвы
Сидяӈг’’: А. Яптик’ тадтавы’’
