Няръяна Ӈэрм
Илна’’ нямна ӈэда юн
Ты’’ саполана ирыхына округна’’ ӈарка ерв тасалковам’ марцьхэхэ’’ната мэ’’ӈаcь. Пыдо’ ӈэрм’ тер’’ ила’ нямна лаханаць. Нерде’ хэтвы вададо’ илебей’’ ненэцие’’ тохолкова’ нямна ӈась.
Дмитрий Артюхов ма’’нисяв, теда’ хойхана вадёданана’’ ӈацекы’’ тарця тохолковам’ мэпто’ серо’’ӈа, сяхаринда манзара пэб’’нандо’ ханяри’ сиддо’ хана пират’’ним’’. Нюдяко хардахат товы’’ ӈацекы’’ сава яхана тохолковандо’ хавна ӈарка хардахана иле хардадо’ танябта тара. Вэба’ ирыхына НУРМК няби Газпром-техникумхана тохолкода’’ едэй иле хардадо’ ӈадимда. Ӈокханда тет юр’’ илебей’’ ненэця’’ таняна иле пиртадо’.
Ӈэрм’ тер’’ серо минрена департаментана’’ ерв Ульяна Каленюк ханзер’’ 2025 по’ ёльцянд’ ю’’ пон’ таславы концепция’ манзаравам’ ваде’’ӈась.Таӈок’’ по’’ ямбан’ ӈавэ’’ сертавамдо’ хэтась. Пили’’ нерде’ ӈэрм’ терӈэ пыхыдадо’ тасламбада’’ ӈопой падарт’, (реестр)ан’ пыхыдадо’ падвы’’. Округханана’’ 98 процент’ пир’’ ненэця’’ ӈэвы’’.
Ӈани’ ӈоб’’ саць тарана юн тарця:
•Хардахана пыхыдадо’ лекаратамбавы’’, тамна ӈани’’ серодо’ тидхалеванзь товы’’ таӈга мякандо’ тэва пиртадо’.
•Тад нерня’ ӈэрм’ терха’’на халям’ ӈаябадӈэ хадабавандо’ няю’ сяни’ падро сертаба ни тараӈгу’’.
•Ты’ пэрма’, халядава’, ханева’ няю’ невхы илна’’ саирм’ минревана’’ е’’эмня няд’’ма’ есям’ няхар’’ миллиард’ пирувна ӈокамдавэдонзь.
• Округна’’ «дорожной карта»хана ӈэрм’ тер’’ е’’эмня тет ю’’ няд’’ма’’ таня’’.
Тюку по’ ты’’ саполана ирыхына округна’’ ӈэвахы ерв Законодательной Собранияхана мэнаха’’ тамна ӈани’ ӈоб’’ ватом’ ӈадимдесь. Пыдо’ мюсертаха’’на ӈамгэ’ то’’олха няд’’ми’’ тарава’ нямна ненэцие’’ помна ӈэдалёрпато’ серо’’ӈа. Илна’’ нямна тарця юнм’ намдаваць.
Автор: Марина Яр’ падвы
Авторы
Няръяна Нгэрм
Темы