Няръяна Ӈэрм
Илна’’ саирм’ теневадо’
Тодо’’ тэнз’’ ӈэрм тер’’ ненэцие’’ поӈгана ила’ саирм’ лэтрамбада’’ ӈока’’. Хусувэдо’ тарана серкана варемда мэ’’ӈа. Нямэхэна тарця манзаям’ минрени’’ поӈгад ненадодо’ тэравыць.
Хусувэдо’ Ямална’’ ерв ненадумда’’мам’ ня’’амвысь. Пыдо’ сиддо’ лауреатӈэ нюмдевы’’. Ӈудито’ терӈэ сидндет ю’’ ёнар’’ есям’ ми’’мыць.
Ненэй ненэцяӈгат Тасу’ я’ тер Мария Салиндер нерня’ ха’’амвыць. Пыда ненэй вадавна сё падыби. Мария Хилидивна иланда’ ямбан’ Тасу’ явхана школахана ненэй ӈацекы харто’ вадахандо’ тохоламбись. Ханяӈыда иландо’ саирӈэ ӈани’ ӈацекы тохоламбавам’ тэраць. Ӈарка нямдо’ манзаяхандо’ пыдаван’ харва’’.
Ӈани’ ӈопойдо’ Антонида Сметанина. Пыда Приуральской районхана тодо’’ тэнз’’ яндо’ тер’’ ила’ саирм’ минрени’’ мякана манзара. Харта ӈод’’ яханандо’ тикы нядо’ сямянхат сававна ненэй ненэцие’’ ила’ саирм’ теневана ненэць’. Сё, сюдбабц, лаханако ма’’ламбада не. Тикыда ӈока нита нерня ӈадимдембида. Иландо’ саирм’ нерня’ минрева’ е’’эмня хуркари’’ тарана’’ грант падыби.
Саляӈгардахана илени’’ поӈгана мале сян ненэцям’ ненадумдавыць. Тасу’ хаби’’ поӈгана Александр Кулиш — юнета хасава. Пыда ӈарка ненэцие’’ поӈгана вадёда’’махаданда харе’’ тэнзата ила’ саирм’ техэ паӈгхаданда теневада. Сита няд’’мяць тасу’ хаби’’ иландо’ нямна мале сян тарана научной книгадо’ ӈадимясь. Хаби’’ нина’’ поӈгана няхар’’ ненэцям’ тэравыць. Тикы’’ — лаханаку, сё, сюдбабц ма’’ламбада Антонина Сязи, сёётэй хасава Валентин Вальгамов, ӈацекы тохоламбада Елена Рыбина.
Яна’’ ерв’ ненадумда’’мам’ ненэцяӈг’’ 2003 поход мипидо’. Тодо’’ ӈэрм’ тер’’ иландо’ саирм’ лэтрамбавандо’, ӈадимдембавандо’ е’’эмня таславэдонзь.
Автор: Солне Ӈокэй’ падвы
Авторы
Няръяна Нгэрм
Темы