обновлено: 09:21, 07 августа 2025
Няръяна Ӈэрм
Иринатоʼ ватовна илеˮ
Маняˮ манзаянаˮ ирмня ханяримна ӈэдалёрӈаваˮ. Тандаярка Тасуʼ явʼ няюʼ тэворӈаваць. Таняна нядэнаˮ ненэциеˮ мядоˮмана ядэрӈаваць. Харта ӈодˮ таремʼ тасла тюку илаӈгана ӈэрмʼ терˮ хареˮ иландоʼ саирмʼ нёда вындʼ саˮӈаˮ. Есиˮ лаӈгоˮмана мядодоʼ мярыбиˮ. Ӈэдяʼ харадʼ няна ӈаниʼ тарцяˮ ӈэвыˮ. Лахарёми ненэциеˮ помна ядэрць минревась.
Ӈэдалаванаˮ мальӈгана Енелава яхамʼ нюракуць хаяваць. Тодоˮ лаӈгоˮ ниня мядˮ, балокˮ ӈыхы янʼ ябере ӈадиць. Хахаяʼ хаюрпатоʼ ханяӈыˮ ненэцяˮ ӈудидоʼ лабпиць. Ӈанохоˮна ӈэдалёртаˮ помнандоʼ нидоʼ сававна теневыдоʼ. Надоˮ ядхана тамна сырада тондысь. Ӈамгэʼ пиркана тэводана мяˮнаˮ ӈадивоˮмахад сиднаˮ ядабтаванзь таӈоцяʼ терˮ лаӈгʼ няюʼ ядаць. Енелаваʼ лаӈгʼ ниня поӈгаˮ, ӈаноˮ, халяʼ сявˮ ӈоныць. Тарцяхаˮ сыраць ёртяˮ ненэцяӈэ тасла пиртыˮ. Ӈавэ хасёдинаˮ мэˮмахаданаˮ мядʼ ерв хасава Марюй вэсако таремʼ вадамда ханадась:
— Тедарихив халяда таня. Явʼ иӈэ хэбта халясяламзетываˮ. Паӈохонанда ӈамгэʼ тоˮолха халянʼ харваваˮ тарця поӈганаˮ пядыбиваˮ. Юту тарабˮ, сэвда нюдя поӈга мэˮӈаваˮ, ӈарка идюрцяˮ ӈаябаданʼ харвабанаˮ, сэвдоʼ ӈарка ӈадимдембиваˮ. Мяни терхаˮна няхарˮ поӈганаˮ ӈулиˮ ёльцьʼ. Саць ханесэйнда ӈока ӈэбˮ сыпин. Сельбяʼ няна ӈаниʼ сава ӈэсеты. Салабанда мэюроˮмахад нянзико салабаʼ нимня ватаӈгурцетыдмʼ. Таʼ ёльцяӈгана халянда ӈавыд ӈаниʼ яӈга. Тёняна мэнаˮ нинаˮ ня, тоʼ тяхамбадаˮ поёнаˮ пилиˮ саваˮ. Тарабата няханаˮ тэворӈаваˮ. Маняˮ мяˮмаˮ сехэрыʼ ниня ӈа, ӈадьбята ниниˮ хэвувнани етриʼ ӈэдалёрӈаˮ. Хардаваˮ ӈодˮ ӈаниʼ хахаи, ӈобˮ часʼ пирˮ ӈэдалёданʼ, тадӈоˮ тарабата телефонʼ мутравна лаханасетываˮ.
Лаханако нянаˮ пухуця Елена Пядювна таремʼ ма:
— Тедаʼ ютумʼ сабе сертабада яӈгу. Маниʼ нюниˮ харвобтэйдоʼ, тюˮуʼ няӈы янʼ ӈэдабтамбасетынʼ. Тулоˮмахад пиреˮмахад ӈаниʼ ӈавыдоˮӈаˮ. Таӈок халяхана тамна порцамʼ пирембасетыдмʼ. Порцаʼ халяда саць ӈока, ханяӈэри хибяри таремʼ пирензюрць ехэра. Халяˮ ӈока ӈэбˮ мыньмʼ тэри нир хаебаӈгуˮ. Халэнаˮ хэвадоʼ саваˮ, едёʼ тудмʼ тэри пинʼ нирˮмоӈгуˮ, пяныˮмана пиревы порца ӈобтикы ёльце ӈавыдоˮӈа. Ханяӈэхэна ёдёʼ туд пиреˮмяхад мэядамбада ӈавэнаˮ юретембиваˮ.
Лахарёваˮ мэць мякˮ турта ненэцяʼ моторʼ ӈаноʼ нултавамʼ нивэваˮ намдˮ. Ӈокавай Николай ӈэвы. Пыда ӈобтикы вадамда ханада:
— Телевизокана юн манэˮлабтамбабатоʼ Саля явʼ мюня ненэцяˮ халядабтоʼ тэтнархаˮ. Пыдоʼ сиддоʼ халяда ниˮ ӈэдарамбюˮ. Маняˮ тюку яхананаˮ таӈга ханеваˮ. Хибяхарт тедариʼ сиднаˮ ни нюракусˮ. Ханяʼ хэванʼ харваваˮ таняʼ ӈэдалываˮ, сяӈок халя тара — таӈокмʼ ватабиваˮ. Тарця ӈылекахад ехэраваˮ, тикавнанда маняˮ Ӈэдяʼ терӈэ ябдаваˮ. Хусувэй ханена харта ёда таняˮ, ханяна сяхаʼ ханевамда харта тасламбида. Ханяна таʼ, сывʼ ёрта, ӈамгэʼ тоˮолха халэта танявамʼ ӈаниʼ харта таслаӈгуда. Ӈодь харт нернякуʼ ӈаˮ, тикахавад хибяхарт сит ни таблаӈгуˮ. Тарабата тикы халэнаˮ мирӈэ мэˮэйнаˮ. Хардахана ӈаябадʼ халянʼ харванаˮ ненэцяˮ ӈока ӈэсетыˮ. Таӈок поʼ ямбанʼ мань таремʼ таӈга ханедмʼ. Ихиня ӈулиˮ сава.
Николайʼ вадавна, ёрманзь ханпатоʼ сидтоʼ нёракута яӈгу. Няˮамравахат яханандоʼ ехэраˮ. Тюку илаӈгана тарця яӈгова ненэся ӈарка ябраха, сяхаʼ, ханяʼ, сяӈок тарабата толянда ниня таӈок ӈаябадда ӈэӈгу. Ти, таремʼ Ӈэдяʼ няна нядэна ненэцяˮ таӈга илеˮ.
Марина Яройʼ падвы
Сидяӈгˮ: Марина Ярʼ тадтавыˮ
