Яӈгана ёльцейд’’

Та’ ямбан’ округханана’’ ты’ лекар’’ саць тэтнаць. Пыдо’ вымна ӈэдалёрӈаць, ӈэсы’’мана ядэрць ты яӈгабиць. Теда’ ма’’ним’’, Ямалханана’’ ӈоб’’ миллион пирм’ мале пардонтавы’’.

Хэвы си’’ив яляхана Ямальской районхана яӈгана ёльцевыд’’. Та’ ямбан’ 86095 тым’ пардонтавы’’. По’ сидя вэкна манзаравандо’ мальӈгана 196 ёнар’’ 400 юр’’ тым’ яӈгавы’’. Малкось вэнеко ӈод’’ ӈани’ яӈгабавыдо’. Тюку по’ халы’’ пардонхана пэрмандо’ хавна няндо’ ӈани’ чип ӈабтамбавы’’. Ӈокхана 906 вэнм’ лекар’’ манэ’’мы’’. Ты, вэно яӈгабавандо’ хавна районханандо’ ты’ пардон’ аптечка мипавы’’. Ты пэртя’’ 329 аптечкам’ ня’’амвы’’. Тикандо’ мюня хусувэй тарана пардондо’ таня’’.

Ямална’’ тиӈгывна ӈокханда миллион’ пир’’ тым’ яӈгавы’’. Тарця тарана манзаям’ сиднтет ты’ лекаро’’ бригада минредо’. Яӈгавэдо’ тэдо’ тола 494 ёнарӈэ харва, 84 ёнарт’ биркы ӈабтавы’’. Тамна няхар’’ ю’’ тет тэхэд вэям’ ханавы’’, тикахатато’ тына’’ бруцеллёзто’ хабця’ танявам’ тасламбаӈгу’’. Ты пэртя’’ малковандо’ ёльцяӈгана вэнекосипой’’ ханзеркарт я’’маӈгудо’, тикыдо’ ӈули’’ ӈарка няд’’ма’’. Ӈадьбято’ ӈани’ пардонхана лекаратамбидо’. Тюку по’ самляӈг ёнаркад вата вэнеком’ яӈгавыць. Пыдо’ хабцяӈодо’ тамна’ тяха’ тэхэ’’, ненэцяӈг’’ палаӈга пирӈадо’.

Яӈганавандо’ пуд ненэсянда сяӈок тым’ пардонтавамдо’ тамна сававна таслаӈгудо’.

М.Яр’ падвы

Авторы

Няръяна Нгэрм

07:11, 17 сентября 2024

Темы