Няръяна Ӈэрм
Яханандо’ пирдырмы’’
Саляӈгардан’ 11-13, 14-15 похо’’на мэна’’ ӈацекы’’ турӈаць. Пыдо’ мале сян яля’ помнандо’ сянакуць. Мэбе’’мамдо’ санарма’, сюрберма’, тубкам’ моёпава’, яркулава’ сер’ хорпидонзь. Едэйвана тоходанана’’ сёбаркоця’’ тодо’’ районто’, хардато’ ед’ пирдырӈаць.
Сидяхаюдо’ Ямал’ рекордм’ мэӈаханзь. Самбург’ тер Константин Адер сюрамбахая ӈопой яхад няхар’’ мэва санармахана 10 метр’ 12 сантиметр’ ёльцянд’ тэвавыць. Белоярск’ тер Артём Талеев 710 ханм’ санавысь.
Пел’’ пирдырмидо’ мякана спортзал’ мюня ӈаць. Ӈанидо’ пихина пэръядонзь. Тубци моёпавадо’ яха’ сэр’ ниня ӈась. Яля’ еркана таняна ма’’люрӈаць. Ӈопой хасава ӈацекы’ тубкада ӈули’’ сававна тирць хаясь. Харампур’ няд товы сибимдей классахана мэна Никита Айваседо ӈэвысь. Юкад вата сидя потнанд вадада мин’’ӈась:
— Тубками 119,50 метра хунат’ тий’’. Ни’’ни нерня’ еремядм’. Тарця сянакубц самляӈг по’ пирт’ торомдамбин. Моётава’ мальӈгана нянани сабе ни саӈговос’’, ныхыри тара. Саць тю’’умна нисетыв ӈэдарамбю’’, тасикумна пэрцетыв. Няръяна ене’’мым’ тяха’ танхалӈга вэва. Ентевы’ хэвнямна ханпата ни тара’’. Хано санарпа ӈани’ пир’’ӈав. Сидя юркад тянём’ нисетыдм’ санарпю’’. Си’’ми тарця серт’ неками Сергейми тэврась. Няхар’’ по’ тяхана рекордм’ мэсь. Тюрамда 222 яркадась. Сидна’’ тохоламбдава’’ ӈобкарт’ матадм’ нибат мы’’, манзеты: «Ӈанихи’’на ябдаӈгун. Тамна варева’’ мэць хамекоива’’». Сёбар’’ ӈацекы’’ нерняри’ ӈэя’’. Выдараӈгвахад ехэрая’’, хусувэхэт ныхыдамдо’ хомбая’’.
Сита тохоламбадада Иван Пяк тарем’ мась:
— Тет ӈацекым’ тадамзь. Никита Айваседо няби Артём Пяк 11-13 пота’’ поӈгана пирдырӈаха’. Даниил Айваседо няби Анна Агичева 14-15 пота’’ поӈгана мэӈаха’. Маня’’ яхадана’’ Самбург’, Тарка Саля’ тер’’ тоць. Пелдо’ няби нями тэврэйдась. Сяхаӈгав’ си’’ми тохоламбись. Илни ямбан’ хэвханани мэ. Теда’ си’’ми ӈани’ нядабасеты. Овгортхад ӈа. Тарка-Саляхана иле. Таняна физкультурам’, «северное многоборье»м’ минре.
Ваде’’мы Никитава’’ сита ӈар’’ нита поӈгана ваць нерняна миӈа. Пыда сюрамбахая няхар’’ яӈорэй’ санармахана нябимдеясь (мэвыда — 7,50 м.). Яркулавахана ӈани’ нерня’ ха’’мыць. 250 ханм’ санавысь, няхаромдэйм’ ханавысь.
Сямянхат пэдавыдо’, харбёдо’ «Арктические игры» сянаковахана мэӈгу’’. Россия’ тиӈгыхыд ӈэда’’ няха’’нато’ Саляӈгардахана няби Си’’ив Харв хардахана пирдырта’’.
Автор: Анна Яптик’ падвы
Авторы
Няръяна Нгэрм
Темы