обновлено: 10:46, 15 ноября 2024
Няръяна Ӈэрм
Ямал – маня’’ ява’’
Носиндалава’ иры’ тетимдей яляхана яна’’ тиӈгывна тодо’’ тэнз’’ ненэцие’’ ӈоб’’ няю’ нятва’ ед’ таславы ялям’ мэ’’ӈаваць. Ямална’’ ханярина хэбидя ялява’’ тид’’ миӈась. Хусувэй районхана, маркана пирдырма, сянакова, тамна ӈани’ сава серо ӈадимдембиць.
Тарем’ Яр-Салехана концерт ӈэвы, хуркари’’ тэнз’’ вадавна ӈэда сёхо’’ инзелевы’’, тарабцо маниевы’’. «Ямал» нюбета общественной движения’ тер’’ культура’ мякана ӈаврана’’ тэнз’’ нямна лаханавы’’. Мядондидо’ ханюй ӈамзам’, халям’, ӈоди ӈормы’’. Ӈани’’ Ямальской район’ хардаха’’на ӈобтикы тодо’’ тэнз’’ ненэцие’’ ила’ саир’’ нямна ӈэда фестиваль ӈадимдевы’’. Ханярина харто’ ембдяродо’, мысыдо’, ӈаврадо’ ваде’’мы’’.
Тасу’ я’ няна «Тесто да мясо» пирдырма мимы. Таняна илена’’ тодо’’ тэнз’’ ненэця’’ ӈавар пирембавы’’. Мядондидо’ хаби’’, луца’’, киргиз’’, ногай’’ лески хораць пир’’мы’’. Ненэй ненэця’’ «Невхы ва’’алӈэ» нюмдевы ӈаврадо’ нябимдей ян’ ха’’амвыд’’. Тикы’ хавна 70-90 похо’’на ӈадимы сё мэ’’мы’’.
Пэ’’ няна Аксаркахана ӈоб’’ няю’ нятвамдо’ ӈадимдемба сюдбяко «хоровод»м’ пихина сертавы’’, харто’ имбытадодо’, паныдо’ сервы’’. Тодо’’ тэнз’’ ненэцие’’ культура’ мяканандо’ «Письмо Героям» акция мимы. Ява’’ лэтрамбадина’’ е’’эмня сидя юкад вата мядонзэй падарм’ хамэдавы’’. Таддикахад сайнорма’ няна яӈгумы нидо’ тензибтевы’’.
Нядэй яхана ненадо яля’ ед’ «Сквер трудовой славы» нюбетахана ма’’лёвы’’. Тикахана «В дружбе народов — единство страны» сава сер’’ мимы. Нядаӈгарад’ тер’’, хуркари’’ манзаяха’’на манзарана’’, мядонда’’, «Тови Най», «Ямал-ню’’на’’ я», «Солидарность» общественной организация’ тер’’ няхато’ сейхад минда вади мэ’’мы’’. Сиддо’ маймбтаванзь тарана’’, сё мэта’’ нидо’ товы’’.
Шурышкарской, Пуровской, Красноселькупской районха’’на ӈобтикы илека серо ӈадимдевы’’. Яна’’ тиӈгывна юркад ӈока’’ тодо’’ тэнз’’ хибяри’’ иле’’. Тюкохона хусувэва’’ харта невхы паӈгода, ирината няби хаданата табеку нёда. Тецьда ява’’ маня’’ мал’ мэнена, сямянхат сава ява’’. Няхатана’’ яӈгавава’’, нина’’ нядабавава’’ ныхыва’’ ӈармдамби, сидна’’ мэбеламби.
Анна Яптик’ падвы
