Няръяна Ӈэрм
Ямал тахат тоӈаш’’
Няхаԓдюԓ мянаԓта’’, кашем’дюԓ чет’ ты’’ кан’’. Новый — Уренгойхана тэхэ’’на мансԓани’’ дяԓям ‘’День оленевода’’ мэ’ӈаш’’. Чуки похона поӈкнантуӈ шана’ко мянаԓмантуӈ мэты шанат дяхат мэна’’ неша’’ тоӈаш’’.
Тэхэ’’на мансԓани’’ дяԓям Новый — Уренгойхана няхамты мэмаӈ шеԓтаматуӈ. Чуки похона праздниктоӈ ӈай Седэ-Яха няна мэӈатоньш. Няхаԓдю’’ няхаԓ ненэй мяту’’ меӈаш’’. Шича дяԓяӈ дямпан шана’кота мянаԓяш’’. Ӈэԓм’ чеԓ’’ неша’’ Ямал тахат тоӈаш’’, праздникхана шанат районхат’’, каԓтыхит’’ мэна’’ тадямэӈаш’’. Ӈопшеԓ няхаԓдюԓ мянаԓта’’.
Маня’’ Пюԓ дяхатана мэна’’ неша’’ ӈупчики Новый — Уренгодян тоӈаш’’. Мячидёԓьчи’’ поӈкна Енкся Пяк тадямэӈаш, ши’та тэхэ’’на мансԓани’’ дяԓяхана ныптакоманта мэт Новый — Уренгодян каптамай. Вайсы’ку маньшту: «Четаӈ шанат дяхат мэна’’ нешади’’ маныӈат. Мянаԓта’’ неша’’ няматаԓакуԓма дяԓяхана ӈука’’. Кукиты мятчеԓсамэй томай’’. Чупей хома шоньшахана ныптаку’’». Праздникхана хыниԓмантуӈ мэты шанат тэмс неша’’ тоӈаш’’. Няматаԓакуԓма дяԓян томы’’ нешай’’ хомана ныптакомаӈ мэты, куԓкаԓи’’ мероприятии’’ мэ’ӈаш’’, шанат шана’кома площадки’’ шеԓтаӈаш’’. Хcтмайтуӈ ӈамыкутуӈ ӈычимчемпюта’’ тадямэӈаш’’, ӈамԓу’’ мичиԓпёта’’.
Шича дяԓяӈ дямпан ӈопшеԓ дюԓкат ва’та’’ няхаԓдю’’ артист’’ кынуӈаш’’, таԓаӈаш’’. Неԓьче’эй дяԓяхана мянаԓта’’ тыӈ канхана няматаԓакуԓяш’’. Ӈайтаԓё касама’’, неӈи’’ мянаԓяш’’, ӈопшеԓ хампԓяӈкдю’’ шича тыӈ кан’’. Ӈайтаԓёта’’ шич’мана ӈуп диԓьшуӈ мансхаԓьштуш’’. Тыӈ канхана ӈайтаԓёш чепиԓмы’’ поӈкна ӈайвахай местам’ Пуровский’ районхат томы, Самбуԓкахат мэна Алексей Хатанзеев канаӈаташ. Няматаԓакуԓьш мянаԓмы’’ ни’’ поӈкна Пуровский’районхат мэна Галина Пяк ӈайвахай местан ка’амдяш. Галина тамна нючаӈc хомана ӈайтаԓёш тохоӈаш, пы’та дёԓьше пимши, ӈука мэмаӈ няматаԓакуԓьш ӈайвахай мести’’ канашту. Шича дяԓяӈ дямпан мянаԓта’’ шана’куш’’: нэхэԓумпиш’’, шалди’’ ӈыԓна нюмкупёԓьш пы’татуӈ конуԓпиш’’, няԓяӈ паӈк вяԓкуԓпиш’’, ха’’муԓяш’’, этно-биатлонхана мянаԓяш’’. Касами’’ поӈкна нэхэԓумпёш Павел Тайбери ӈайвахай местам канаӈаш, ни’’ поӈкна Марина Яунгад нэхэԓяш. Этнобиатлонхана мянаԓьш пиԓи нюӈкӈc Юрий Лаптандер ка’амдяш.
Праздникан томы’’ неша’’ хомана ныптакуш’’. Тыӈ канхана ӈайтаԓёш ӈайвахай местам’ канамы’’, шана’ко мянаԓьш нэхэԓмы’’ тотуӈ миԓита’’ мячисы’’ ня’амӈаш’’.
Автор: Андрей Пяк патмы
Авторы
Няръяна Нгэрм
Темы