обновлено: 08:22, 08 октября 2025
Няръяна Ӈэрм
Яндиʼ тер нядабаӈгухуʼ
Вэбаʼ ирыʼ 29 яляхад хорˮ ирыʼ 7 яляʼ ӈэсондʼ Москва маркана ӈэрмʼ терˮ тохолкова «Школа общественной дипломатии» минда. Няхаромдэй пеляханда юкад вата сиˮив ненэцямʼ тэравыць. Маˮлавыдоʼ Россиянаˮ ханярид ӈаˮ, юдʼ мянʼ ёˮ вакхат товыˮ.
Маняˮ яхаданаˮ таняʼ сидя няваˮ хаяханзь. Пыдиʼ сидябты хартиʼ тэнзадиʼ нерняʼ минренахаʼ. Галина Косыгина (Ядне) Саляӈгардахана иле, округнаˮ тодоˮ тэнзˮ ненэциеˮ Ассамблеяʼ ӈэвахана мэнаӈэ тара. Иван Сандрин Мужи харадʼ няд ядэрӈа, райондоʼ серо тасламбада, няˮамбада хардахана манзара. Ялэхэˮ пэртаˮ манзаитиʼ хавна ӈамгэри ӈамгэхэна яндиʼ тер нядабасетыхыʼ, луцаʼ вадавна хэта общественной манзаямʼ минресетыхыʼ. Нямэхэна хабиˮ яʼ нямна ӈэдалёрӈахась. Тамальӈгана няхарˮ юˮ тохолкодась, тикыˮ поӈгад сиддиʼ тамнаʼ тяхаʼ хана таславыць.
Тедаʼ янаˮ ӈарка хардахана ӈэда ӈани ёˮ поӈгы серкˮ ненэцие тохоламбада институтхана, МГИМОʼ няна маˮлюрӈаˮ. Сиддоʼ тикы тохолкулаваʼ яхана манзаранаˮ, тамна ӈаниˮ серо теневанаˮ хибяриˮ тохоламбиˮ. Еˮэмняндоʼ хуркари тохолкови хамэдавыˮ. Ненадовна пуна пыдоʼ минаць лахана, падро ервхаˮ падыба, иламʼ савумдамбада проект падыба, илмаˮ мэйрамбада вату нерняʼ пэраць, тикахад ервхаˮ вадамʼ тэврамба теневабтоʼ тара. Ӈадьбята Россиянаˮ сямянхат тюˮуняʼ мэна ерво, хартоʼ индоʼ серʼ манзарани, тодоˮ тэнзˮ ненэциеˮ организация няˮамбади, ООНʼ тер, вату тасламбади, падыбади лаханако нятаˮ.
Малевандоʼ серʼ сямянхат ваˮлёймдоʼ тэраӈгуˮ, нянда миллион есямʼ митаˮ. Пыда магистратуранʼ хэсь пиртада, MBӇ программанʼ пыхыдамда падбата ӈодˮ. Сита хавна юкад вата тетамдоʼ ненадумдаӈгуˮ, хуркариˮ ёльцяндоʼ тянё тохолковахаˮна, Россияʼ няби ӈаниˮ ёˮ тиӈгывна минда серкаˮна мэсь пиртадоʼ. Яӈга Школандоʼ конкурс ӈаниʼ таняӈгу. Мале сянхандоʼ грантʼ есиˮ нядˮми митаˮ. Тедариʼ юндаваˮ ӈатеваˮ, хибямдоʼ нерняʼ мэвамдоʼ няндаˮ вадетаваˮ.
Анна Яптикʼ падвы
Сидяӈг: Анна Яптикʼ тадтавы
