обновлено: 05:04, 02 декабря 2024
Няръяна Ӈэрм
Яндо’ тер нядаби’’
Ням’ нядабава — саць тарана сер’’. Илаӈганана’’ тарця’’ хибяри’’ ӈока ӈэбато’ ӈод’’ маня’’ манэць ехэрына’’, минрена манзаяндо’ нямна вадам’ ни’’ мэс’’. Тюку по’ пыдо’ ӈобт’ ма’’люрӈаць.
Нюдя пэвдей иры’ юдимдей яля’ пиркана Ноябрьск маркана ӈоб’’ ненадо сер’’ ӈась. Таняна округна’’ НКОха’’на мэна’’ ӈарка тасалковам’ мэ’’ӈаць. Ӈобкана ӈопой недам’ нёданаӈэ хуркари’’ тарана’’ серо тасламбиць. Ханзер’’ тад нерня’ манзаравамдо’, нидо’ нерня’ тидхалембавамдо’ ӈобкана ваде’’ӈаць. Тарця’’ организация’’ есям’ ни’’ недвопю’’, пыдо’ тэри индо’ ядан’ харвобцорихина ненэцие нядабавандо’ е’’эмня сертавы’’.
Маня’’ ӈэрм’ терӈэ ӈани’ ӈоб’’ тарем’ нядаӈгода организациява’’ таня. Ямальской районхана ӈа, «Ямал» м’ нюбе’’ӈа. Яханандо’ невхы иландо’ саирм’ нёдана’’ ненэцие нядабава’ няю’ ӈадимдевы. Сяни’’ по’’ ямбан’ нядандо’ няд’’мадамдо’ пюрта’’ ханярид турцеты’’. Ӈобкартамдо’ тэри терси’’ ни’’ ӈэдарасету’’. Сяхаринда районандо’ тер’’ тенева’’: сэхэн’ ерембато’ «Ямал» организациядо’ сидто нядаӈгу.
Теда’ Ноябрьскхана мандалавахана тохолковандо’ хавна округна’’ тиӈгывна ва’’лёйвана манзарана’’ организация ненадумдабавыць. Пыдо’ няхар’’ по’’ тарана серо минребато’ таравы. Нерня’ ха’’амвы’’ поӈгана теда’ вадемэва’’ «Ямал» нюбета организация ӈэвы. Ӈэвахана мэнадо’ Валерий Сойкович Худи таня’ ӈэдалёрӈась. Пыда тарем’ мась:
— Ямалханана’’ нюртей яӈорэй’ индо’ ядан’ харвабцорихина ненэцие нядабади ненадумдабиць. Маня’’ тамина’’ нердена ненадумда’’мам’ ня’’мава’’. Ихинани хамедамбив — яханана’’ хумбанзи’’ нива’’ манзара’’. Маня’’ харе’’ яна’’ тер’’ е’’эмня, ненэй ненэцие’’ ед’ ӈарка таром’ ха’’аврамбива’’. Сидто’ хибяхарт маня’’ хавнана’’ ни нядаӈгу’’, ӈадьбяна’’ е’’эмняндо’ хусувэй яля’ варева’’ мэ’’ӈава’’.
М. Ярой’ падвы
