Няръяна Ӈэрм
Яр-Саляʼ ты пэртяˮ илʼ
Яр-саляʼ выӈгы ненэцяˮ неняӈгˮ ирыʼ пудана яляхана сёдна ханодоʼ сёмбиˮ. Сельбяʼ няна тикыриˮ ӈамгарихитоʼ тэваӈгудˮ. Таʼ ямбанʼ нерняриʼ мюсерӈаˮ.
Ямалʼ няна мюсертаˮ ӈысыˮ — Сеяхаʼ няюʼ ёндаˮ, тамна харвабта тикыʼ тяхаʼ тэвортаˮ –хаебада ядоʼ ӈока. Пыдоʼ вэняӈы ӈэрмʼ терӈэ толыˮ. Яʼ поӈгана ханодоʼ сибявна пэмбаваʼ еˮэмня ӈамгэридоʼ сёнзь хаебидоʼ. Тикыˮ седаˮ ханхаˮнатоʼ сельбяʼ ёльцьӈгана таравандаˮ ӈамгэриридоʼ хаебиˮ. Ёря паныдоʼ, мальцидоʼ, ӈэрёʼ мэтаˮ мюйкудоʼ, хорˮ, буранадоʼ — малʼ пилюˮ ирыʼ пэвдавэйˮ хаебидоʼ. Сыраʼ таравандидоʼ малˮ ӈэвадяркана хаерць вуниˮ пэрˮ, таʼ ертʼ пирадˮ пэмба пэръядоʼ.
Ӈысы няˮамбадаˮ Ямалʼ няна нернярина мюсерӈаˮ. Таремʼ ӈобриˮ мюсеˮ, тытоʼ ямʼ савадаˮ, ӈопойриʼ яляʼ минаˮ. Хартоʼ иленаˮ ты пэртяˮ сабе таремʼ нернярина ниˮ мюсерˮ. Пунякуна Юрибейʼ ӈэсондʼ тэворӈаˮ, ӈопой, тыдоʼ ӈокаркаˮ, хартоʼ иленаˮ — ӈысыˮ пирувна мюсерӈаˮ. Нёйˮ тоʼ тяхаʼ ханˮӈаˮ.
Яр-саляʼ сятаняӈыˮ ӈысыˮ Бованенковоʼ няʼ тэворӈаˮ. Нарахад тет юˮ самляӈг ӈэдалавамʼ пэрӈаˮ, маханяӈыˮ юˮ ӈысыˮ ханлавадоʼ хахаярка — Нёйˮ тоʼ ӈэсондʼ. Сятаняӈэхэдʼ юˮ ӈэдалаваʼ пирувна тянё.
Пуняӈыˮ Ямалʼ терˮ сыраʼ ханодоʼ ӈопойри ӈэвадяркана хаебидоʼ. Пыдоʼ саць нерняʼ ниˮ мюсеˮ. Пилюˮ ирыʼ пудана ялэˮ пиркана пуняʼ салаӈгаˮ, ӈока я тэваданадоʼ яӈгу. Ӈацекытоʼ тохолко хэˮмяхад, хартоʼ иленаˮ падде няˮмы няхататоʼ тэраӈгосетыˮ. Хорˮ ирыхына пуняӈыˮ ненэцяˮ сыра ханотоʼ хэвхана мэˮ. Таминдоʼ ӈэвадяркана халядамдоʼ сэрабтамбиˮ, таʼ ӈамгаридоʼ ӈахакуд хурабиˮ, нерняна мюсертаˮ нитоʼ тобˮ — минʼ нид хэвняʼ хандаˮ.
Хартоʼ иленаˮ ӈацекыдоʼ мерарка тохолко ханабидоʼ, тиртя ӈано пилюˮ ерʼ пиркана турӈа.
Ӈысыˮ терˮ ӈацекыдоʼ яноць ханˮӈаˮ. Пыдоʼ ниˮ тэраӈгурˮ. Ваˮлиˮ мэˮ: тыдоʼ яӈгаваʼ еˮэмня, хэвняӈы ӈобдёда тымʼ тэра тараӈгу. Ханяӈыˮ ниня манзаранаˮ — хибяˮ паде ӈысынʼ ӈэсовыˮ, вакна хартоʼ янʼ тыдоʼ тэрабидоʼ. Тикыдоʼ хорˮ ирыхына манзаяйдоʼ.
Выʼ терˮ иландоʼ тарця, ӈобриʼ мюсе тара, тикырихина тэсавэйˮ ӈэӈгуˮ. Яʼ малда ӈобʼ таняӈгу, нябиʼ серʼ хусувэй ӈамгэда ёхода: тэда, яда, мята терˮ — тикысипойˮ иле яˮамаӈгуда. Илеваʼ ямбанʼ иландоʼ тарця!
Татьяна Сэройʼ падвы
Авторы
Няръяна Нгэрм
Темы