Няръяна Ӈэрм
Яр-Саляхана тасалкуць
Тюку сиʼʼив яляхана Ямальской районхы Яр-Саляхана ӈарка ненадоʼ серʼʼ ӈась. Таняна «Ямал-нюʼʼнаʼʼ я!» Ассоциацияʼ правленияʼ терʼʼ тасалковамʼ мэʼʼӈаць.
Таремʼ тасалкубидоʼ районвана мэ”мамʼ мале танякуй поход минрейдоʼ. Тасуʼ явʼ няюʼ ӈэдалёрӈаць. Хальмерʼʼ Седеʼʼэхэна мэвандоʼ мальӈгана яʼ тебтмʼ нэкалпади няць ӈобкана тидхалембадаʼʼ серодоʼ тасламбиць. Поётоʼ сава ӈэвамʼ, нидоʼ хамедамбавамдоʼ манэʼʼлабтавыць. Яр-Салянʼ правленияндоʼ терʼʼ тэвормадоʼ яӈгу. Пуданаʼʼ сян поʼʼ серʼ нюртей мэваʼ таняʼ тэввыдʼʼ.
Правленияхана мэнаʼʼ ненэцяʼʼ ханзерʼʼ яндоʼ тер нядабавамдоʼ вадеʼʼӈаць. Небоʼ «Ямал-нюʼʼнаʼʼ я!» Ассоциациянʼ 595 ненэцяʼʼ нядʼʼмадамдоʼ пюрць лаханавыць. Хусувэй хонаркодаʼ тоенана сермʼ правленияхана мэнаӈэ тяхасовна тасламбидоʼ. Ханяӈэхэна ханзерʼʼ яʼʼамнамда тидхалевамʼ табедамбиʼʼ. Ӈока ӈамгэмʼ илаʼ няюʼ ӈадимдець. Таремʼ сидтоʼ нядʼʼмяць «дорожной карта»ваʼʼ яӈгамась. Тэри хумбанзяда яхад нядʼʼми ниць ӈадимдембюʼʼ, ты пэртиʼʼ помна ӈэдалёрӈаць. Пыдоʼ мюсертаʼʼ ненэцие тидпойʼ лаханакурць няйдонзь, нянандоʼ ӈамгэ таравамʼ хонрамбиць. Небоʼ халяданаʼʼ, общинаʼʼ терʼʼ тоенанаʼʼ серо тасламбиць. Таʼ есиʼʼ хараʼʼманаʼʼ ӈока ненэцямʼ ядабтаць. Ёрти лаханако няʼʼмандоʼ пуд ӈани тарана нядаӈгосэй ӈадимдець.
Тюку поʼ «Ямал-нюʼʼнаʼʼ я!» Ассоциацияваʼʼ ӈаниʼ ӈобʼʼ нядʼʼмамʼ сертаби. Невхыʼʼ иринатоʼ илаʼ саирмʼ нёданиʼʼ нямна ӈа. Ханеваʼ няюʼ тунимʼ мэць тохолковаʼ еʼʼэмня есямʼ салдамба нядабаӈгудоʼ. Ненэцяӈгʼʼ тохолковандоʼ, иле мядотоʼ няюʼ садʼʼмы есьдоʼ, лекарахаʼʼ ядэроʼʼмидоʼ Ассоциация пырдариʼ салдамбаӈгуда. Хусувэй тохолкованʼ харвана яхананда Ассоциациянʼ лаханабта сероʼʼӈа. Тарця тохолковамʼ мале сидя группа мэʼʼмэдась. Ӈобтоʼ Ямальской районʼ терʼʼ ӈэвыць.
«Ямал-нюʼʼнаʼʼ я!» Ассоциацияʼ ӈэвахана мэна Эдуард Хабэчевичʼ вадавна, манзаидоʼ тодоʼʼ серо няʼʼамбадаʼʼ ерво няць тидхалембидоʼ: «Ӈопойриӈэ ӈамгэхэртмʼ нерняʼ нинʼʼ тэвраӈгуʼʼ».
Тасалковандоʼ мальӈгана нидоʼ нядабадаʼʼ ненэцие ненадумдаць. Поӈганандоʼ Сюнай-Саляʼ школахана манзарана — Валентина Владимировна Тадибе, пыда «Маябцо» ансамбальхана хыноʼʼӈа. Няби — Евгений Варьевич Худи, ненэй ненэцяӈэ илнаʼʼ саирмʼ техэ паӈгханда теневана няваʼʼ. Табекохота инзеленаʼʼ луцаʼʼ хуркариʼʼ кино сертабиʼʼ. Тамна ӈопойдоʼ — Пудако Сюнзивич Сэротэтто, пыда ӈацекы, илебей ненэцие сёбарʼʼ иландʼ тидхалемби. Сяниʼʼ яӈорэйʼ ӈацекыда ӈока нитоʼ поӈгана нерняʼ хаʼʼморцетыʼʼ. Тикыʼ хавна Эдуард Хабэчевич районандоʼ ервмʼ Артем Игоревич Чулановмʼ сававна сидтоʼ мядолаванда няюʼ ненадумдась.
Тарцяʼʼ таранаʼʼ серо Ямальской районхы Яр-Саляʼ хардахана тасламбиць.
Автор: Марина Ярʼ падвы
Авторы
Няръяна Нгэрм
Темы