Яваˮ лэтрамбадина еˮэмня

Саляӈгарданаˮ терˮ яваˮ лэтрамбадаˮ нинаˮ еˮэмня ӈока нядаӈгосэй ӈадимдембасетыˮ. Таранаˮ ӈовори няндоʼ ӈэдарамбасетыˮ. Нянандоʼ ӈока ӈамгэ тара. Ӈобˮ няваˮ — Некоча Окотэтто сэдора нядаӈгова проектмʼ минре.

Хорˮ ирыʼ самлянзимдей яляхана нюртей маˮлёвадоʼ ӈэвы. Сэдыбавандаˮ ӈаворидоʼ, сэдора мэˮманда машинкидоʼ тасламбавыˮ. Тикахана ембдяро: сава, ӈоба, имбытад сэдыбиць. Хибяриˮ нядаӈгованʼ харванаˮ тось пирӈаць. Хусувэй ныланаваʼ яляхана маˮлюрӈаˮ. Сава таромʼ сертабадаˮ нини нядаванзь тандаяʼ манзара няни няʼ ханˮӈанинзь. Ӈобкана нядаӈгованʼ харванаˮ неˮ мале ӈока маˮлыць.

Тецьда мерця нумгана ӈани яхана мэнаˮ няхананаˮ юдерˮ ембадирˮ тараˮ. Нюлак, лимбика тохокад сядмʼ талыбада сави сэдыбиваць. Ханяӈыˮ парколаць.

Манзаинаˮ пэрˮманаˮ мальӈгана харˮнаˮ помнанаˮ няндеромбиваць. Некочамʼ проектанда нямна хонрамбивась. Пыда таремʼ лаханась:

— Яваˮ лэтрамбадаˮ нинаˮ нядабабнаˮ сероˮӈа. Мань тюкумʼ пявани нерня ихиняни тасламбивась: «Таняна мэнинаˮ еˮэмня ӈамгэ сава таромʼ хаˮаврабˮ сава ӈэдакы?» Имбытадоʼ сэдыбава проектмʼ тасладамзь. Тикыʼ няюʼ грантмʼ няˮмадамзь. Ӈобˮ имʼ мэта ниниˮ ня сава мэлвамʼ ховаць. «Единая Россия» партияʼ общественной Штаб лоходоваˮ тась. Тохосоˮ мандалмʼ интернетʼ мутрамʼ нядˮмяць ховаць. Сэдора мэˮманда машинкадваˮ хосаваˮмаˮ. Нядаӈгованʼ харванаˮ ненэцяˮ турцетыˮ. Тедаʼ няхаромдэй маˮлёвахананаˮ матˮ юˮ сядмʼ талабада савамʼ сэдаваˮ. Хорˮ ирыʼ пудана яляхана ӈавори ӈэдараванзь пэрӈаваˮ.

Маняˮ ӈодˮ сэдъинаˮ ӈаниʼ ханаӈгудоʼ. Тарця саваˮ таранаˮ ӈавэ нерняʼ минре тараˮ. Таремʼ манзаранаˮ нидоʼ мание ненэцяˮ ӈаниʼ тованʼ харбилаӈгоданакыˮ.

Автор: Р. Окотэттоʼ падвы

Сидяӈг: Анна Яптикʼ тадтавы

Авторы

Няръяна Нгэрм

10:07, 23 октября 2024

обновлено: 10:10, 23 октября 2024

Темы