Няръяна Ӈэрм
Явоˮ есиˮмана ӈэдалёрӈаваˮ
Таӈы нумгана нюдякоˮ хардахаˮна иленаˮ нинаˮ няхатоʼ таӈга тэворӈаˮ. Таремʼ нянандоʼ нядˮмаӈэ ту ӈаноˮ тарасетыˮ. Ненэцяˮ ӈамгэри таранадамдоʼ тэмда, нидоʼ манэˮманзь ядэрцетыˮ. Неноховавна Саляӈгарадʼ ёльцяндʼ ӈэдалёрцетыˮ.
Хахаяда яляʼ мань Надымской районхы Ӈыдʼ хардахад нердена ту ӈанохона миӈадамзь. «Виктор Черномырдин» нюбета нердена ту ӈаномʼ неняӈгˮ ирыʼ юдимдей яляхана ӈатеваць. Товыˮ ненэциеˮ поӈгана Саляӈгардахад, Яр-Саляхад миндаˮ мэвыць.
Ту ӈановаˮ пиʼ ямбанʼ Ӈыдʼ яхаʼ няˮавхана нусь. Хуняӈы яляʼ ёльцяндʼ мерцяда ӈэрмʼ няʼ сюръхалъяць, сахамась. Таремʼ ӈодˮ хубтахана юдимдей часʼ пиркана Ӈыдʼ харадʼ яха вархад ӈэдалэйваць. Ту ӈановаˮ сата мерцямʼ нивэда пилюсˮ, ӈарка хамбаˮ помна явмʼ мерʼ мадаваць.
Ӈэдалёвэӈэ юдʼ мянваˮ ӈэвакэваˮ. Ӈокамбойˮ пелядоʼ малʼ Ӈыдʼ тераць. Помнандоʼ нидоʼ теневавыдоʼ. Мань ханяӈыдоʼ небянатоʼ нямна, ӈанидоʼ нютоʼ нямна хамедэйнась.
Ӈаркамбой не, Валентина Степановна Салиндер маˮнисяв:
— Тада иры таняна илеӈгудмʼ. Пуняʼ ӈаниʼ тюку ту ӈанохона хэсь тасламбив. Неняӈгˮ ирыʼ 24 яляʼ пиркана Ӈыданʼ пяӈгуда. Ту ӈанонʼ нибˮни еревˮ, илесь яни няюʼ автобусхана хандадмʼ.
Нядаӈгардахад янаˮ терˮ Ӈыдхандоʼ тиртя ӈанохона тэворӈаˮ. Ханяӈыˮ Запорлярныйʼ ёльцяндʼ машинахана ханˮӈаˮ. Тамнаʼ тяхаʼ яхаʼ мюмня ӈанохона ӈэдалыˮ.
Вануйто Алёна — илебей не. Сидя нюкцямда няць мимысь. Ханяʼ ӈэдалёвамда таремʼ вадеˮӈадась:
— Вэсакоми Аксарка — тер. Ненэй мямиʼ Лабытнангиʼ няна ӈэсеты. Таʼ ӈэвадыниʼ. Тыниʼ теневана няхаˮнани мэˮ. Ӈадьбяниʼ Ӈыдхана мядоˮӈадамзь. Ту ӈаноˮ яхананаˮ ӈулиˮ таранаˮ ӈамгэриˮ. Таӈы нумгана Саляӈгардахад таӈга Ӈыданʼ тэва пирӈав.
Яр-Салянʼ нултаванаˮ серʼ ханяӈынаˮ янʼ хамыдаць. Таняна понарка мэваць. Ӈэдалаванаˮ мальӈгана ту ӈановаˮ ӈулиˮ паныць. Ненэцяˮ неняӈгадревʼ хуримна ниӈгэрӈаць. Ӈобкарт терсяда я яӈгусь. Яр-Саляʼ терхат ӈопой теневана нями маˮнисяв:
— Саляӈгарданʼ таʼ етриʼ ӈэдалёрцетываˮ. Ту ӈаноˮ хусувэй сиˮив яляхана таняˮ. Явмʼ вуниваˮ мадабюˮ. Яхаʼ мюмня ӈэдалываˮ. Тедаʼ тобˮни, няхарˮ яляʼ ямбанʼ лапкавна ядэртадмʼ. Теневана ниниˮ мякана сеӈгаӈгудмʼ. Масиˮ лекарˮ мятʼ хэбцудмʼ. Пуняӈы сехэрэни билетмʼ мале ӈахакуд тэмдавась. Таславы яляхана мякни хандадмʼ. Пыдараˮ ситаˮ тотревʼ тиртя ӈанорихиˮна ниваˮ ӈэдалёрˮ. Тикэда ёльце сава. Билетанаˮ саць ниˮ миресˮ. Тикахад тамна «Морошка» нюбета картамʼ нядˮмаӈэ мэˮӈаваˮ. Тэмдорпˮ, сехэрэнаˮ мирˮ тянюворӈа.
Таремʼ таӈы нумгана Ӈыдʼ терˮ Ямалнаˮ ӈарка мартʼ тэворць пирӈаˮ. Юдˮ поˮ тяхана ненэцяˮ тикы ӈаномдоʼ мале маӈгтыˮ ирыʼ пуданаˮ ялэˮ пиркана ӈатесетыдоʼ. Саляӈгардахад тохолковандоʼ пуд Ӈыдʼ терˮ ӈацекыˮ мандалӈэ тосетыˮ. Ӈарка харадˮ нямна ӈэдалёрманʼ харванаˮ Саляӈгарадʼ няʼ пясетыдоʼ. Тикахад таʼ ямбанʼ неняӈгˮ, тамна пилюˮ ирыхына янаˮ терˮ таӈга ханяриʼ хэсь пирӈадонзь. Тохолкодаˮ ӈацекыˮ вэбаʼ ирыʼ нерцюна пудана ӈанохона пырдариʼ тохолкова яхандоʼ малˮ ӈобкана хэсетыˮ. Небянадоʼ, нисянадоʼ нись тоса ӈэдабтасетыдоʼ. Ӈока ямʼ нисетыˮ сюртембюˮ.
Галина Окотэттоʼ падвы
Авторы
Няръяна Нгэрм
Темы