обновлено: 04:15, 28 ноября 2024
Няръяна Ӈэрм
Ю” по” сиддо’ мэбела”
Тандая’ Саляӈгардан’ юр’ мян’’ тодо’’ тэнз’’ илебей’’ ненэця’’ «Российский Север» нюбета форуман’ тоць. Ӈокаюм’ пелядо’ Москва марад’ няна ма’’лыць. Ӈанидо’ харто’ индо’ сер’ тэвыдаць. Ямалхана сиддо’ ёльце ӈатець. Тэв’’махадандо’ таминда хардава’’ манэ’’манзь ӈэдалэйдаць.
Тюку по’ юдимдей’ мэва ма’’лёвадо’. «Российский Север» нюртей еӈгамда ю’’ по’ тяхана Москвахана сертадась. Пуна мале сянхав’ несэй хардавна мюсерӈась. 2020 пуд маня’’ ярихинана’’ ӈэвадяромба пэяць. Теда’ тарця сава серм’ ханярина мэнедо’, хусувэй по’ тован’ харвана’’ ӈокамдана’’. Форумам’ ӈадимдембади’’ вадавна си’’ив юр’’ сидндет юкад вата’’ ненэця’’ падродо’ ӈэдарамбавы’’. Тикэхэт сянамбойрим’ тэрабто’ таравы. Неновна ӈэрм яхана вадёвы, иринато’ сехэрым’ нёдани нерня’ пэрмы’’. Таддикахад няхар’’ ӈани’’ я’ терм’ саць саву’’мы’’: Китай’, Индия’, Аргентина’ няд ӈэди. Серо минренадо’, ӈэвахана мэнадо’ Инесса Яунгад тарем’ ибедорӈась:
— Недармава’’ мале падара, тяхари’ миӈа. Тюку по’ юдимдей соя’’ма’ ялява’’ мэ’’ӈава’’. Мань сяхаӈгав’ 2015 похона нюртей’ мэва’ форуман’ тэвываць. Ӈамгэ’ пиркана грант’ еси’’ няд’’ми ня’’мадамзь. Тикыни пуд нерняри’ ӈадм’. Таӈок’’ по’’ ямбан’ си’’ни тотрев’ ӈуданданаӈэ хэвына’’ ӈока. Ма’’лёвы’’ ӈацекы’’ няна’’ сыраць ӈобтикы тю’’ури’ мимбато’ серо’’ӈа. Нямэхы минда нина’’ е’’эмня варева’’ мэ’’ӈаваць, сямянхат савари ӈаво ӈадимдеван’ харваваць. Ӈамгэри сер’’ ӈопойриӈэ пирдалева’ пир’’ ни ӈа’’, си’’ми нядабада’’ нини хэвханани мэ’’. Илебей’’ ненэця’’ теневабцодо’ ӈокамдаӈгу’’, самляӈг тохолковам’ мэта’’: #Россевер.Родные языки, #Россевер.Сообщество, #Россевер.Контент, #Россевер.Туризм», #Россевер.Имидж. Илаӈгана тарана’’ вато’’ нямна лаханаӈгу’’. Сиддо’ хуркари’’ ва’’лёй’’, манзаям’ теневана’’ тохоламбаӈгу’’. Падвы’’ проектадо’ ӈани’ таняць, интернет’ мутравна ваде’’ядонзь, илека иӈудо’ хэтаць. Ма’’лавы’’ ненэциена’’ тад нерня’ тидхалембаӈгуна’’, нядабаӈгуна’’.
Нюртей яляханандо’ нидо’ торомдамбиць. Маня’’ редакцияна’’ терӈэ мал’’ ӈобанзер’’ сиддо’ манэ’’манзь, тадтаванзь хаяваць. Ямал’, Таймыр’, Ненецкой автономной округ’ няд, тамна’’ ӈани’’ ёхот товы’’ няха’’нана’’ лаханакуваць. Мань Саттане Ӈокдэтам’ хонрамбидамзь. Пыда Тасу’ я’ няд товы:
— Паӈгони Сёяха’ выӈгад пере’’, по’ тяхана вэсакони ян’ тэвываць. Тюкон’ нюртей’ мэва тодм’. Си’’ив по’’ ямбан’ тось енадамзь, ӈабцата си’’ми хана’’. Нямэхэна ма’’нисям’’: «Тарем’ ерембата сит ханаӈгува’’, тедари’ падрод нина’’ ня’’маӈгу’’». Ёльце ӈатенадамзь, няби’’ нини’’ падро мале ня’’маць. Ими хаця вомась. Ихинани мадамзь: «Теда’ нихывабни хань’’, ӈани похона хараси’’ нидм’ ятнаӈгу’’». Ся’’ны’’ ӈэбта ӈод’’ лакри’ сайтан’ тюдм’, падрони ня’’амвыдо’, тикахавахад ӈули’’ маив’’: «Тарси’’ сава, хандадм’, хурка то’’олха ӈэвамда манэтадм’!» Тазовский хардахад сидяӈэ тонинзь, нями Алиса Неркахы, ӈацекы тохоламбадаӈэ манзара, тиртя ӈано’ мюня нини’ торомдэйнинзь. Ӈэдалёро’’мани пуд, маси’’, ныхыми ӈокамда, ӈамгэхэв илека и’ ӈудм’ намдаван’ харвадм’, хар’’н ӈамгэм’ серта пир’’мами хортадм’. «Имидж» трекм’ тэрадамзь. Ӈодяко паӈгалпава, ни паӈгалпава «сообщество»м’ нэван’ харвадм’. Мел’’ не, ӈацекы ма’’ламбаӈгудм’. Тарцям’ нерня’ минре пиртанакэв, нинякэв, тикым’ намда тасламбидм’. Едэй ненэцие торомдамбидм’. Мале сянм’ мале ходамзь, хонаркуць: «Нюмд ӈамгэ тарця, ӈацекыдо’ ненэй нюмгана нюмдебада’’ тамна таня’’?»
Лахарёми’ мале’’мяхадани’ мастер-классаха’’ пароманинзь. Ӈарка лохо’ мю’ сюртяв толь ӈабтавыць. Пи’ хонёвдавэй мимы’’ нина’’ ныланаркаць: сэдораць, ӈодяко паӈгалпиць, нямдхат ик’ тяхана мэта сертабиць. Тамна ӈопой лохо’ мюня квест миӈась. Таняна сэвсялмы ханзер’’ нядаба пэрмам’ ваде’’ӈаць. Сэвдо’ сярхая яӈга пякоцям’ мэць ядэрӈаць, иня’ няӈы ӈудаханандо’ паднаць, нёлёко ӈамгэрико ня’’марпа хорпиць.
Серодо’ мале’’махадандо’ «Дружба народов» лахарё пэяць. Тет илебей ненэця’’ харто’ иле’’мидо’ няна’’ ваде’’ӈаць. Миндо’ ни’ ереберта тоенана серо ханзер’’ сибдамби’’, пирдалемби’’ мал’’ хэтыдонзь. Вадидо’ тид’’ ха’’морӈаць. Пыдо’ мал’’ ӈопой иӈудм’ нёдаць: «Сей пинбата ни тара’’. Тэвадана ӈамгэ янамбовна тэвава’ пир’’. Тапхалпат, ӈани’ юркад’’, пыхыдамд харт нерня’ нэкалпад».
Сидя ӈани я’ терха’, Россиян’ илелмэхэ’ лаханаӈаханзь. Индия’ няд ӈэда ма’’нисяв’’:
— Луца вадам’ тохоламбава тоенарка. Мань тарем’ таславась, етри’ вадам’ теневани лахана нятадм’. Сяхаӈгарт’ ӈопой ян’ нёда’’ нулаӈг’’, етри’ тяхари’ пэрӈара’’.
Нябиюм’ Аргентинахад товы английской вадарим’ мэ’’ӈась. Луца вадан’ тидхалеӈгодада мась:
— Тайкуй падтавы ӈока сюртявсавэй тиртя ӈаном’ падта пиртара’’? Сидяри ненэцяӈг’ мамононди’: «Ӈаха’’». Пуна ӈани’ ӈопой падта’’мам’ манэ’’лабта: тэри сюртявком’. Ӈани’ хонаркурӈа: «Тюку то’’олхам’?» Мун’’ сахамондо’, мал’’ тёреяд’’: «Ханява’’». Илаӈгана ӈобтикы тарця. Хусувэй еӈгава’’ янамбовна танхалпива’’. Ӈармданавана’’ сер’ манэ’’мэва’’, намдавэва’’ ӈокамдана. Ӈамгэри харвабцонда’’ таняб’’, тикымда’’ нёра’’ такалпю’’, нерняри’ ӈада’’».
Пэвсюма’ няӈы ӈора’’мандо’ пуд форумам’ нэць. Округна’’ ӈэвахана мэна ервана’’ марцьхы Сергей Клементьев, ӈэрм’ тер’’ серо тасламбада департамент’ ерв Ульяна Каленюк, «Ямал-ню’’на’’ я!» Ассоциация’ ӈудандана Эдуард Яунгад, тамна ӈани’’ ерв’’ сейхад минда вади мэ’’ӈаць. Мэ’’мы’’ вадито’ пуд туӈгос’’, ненэй сёхо’’, ӈэрм’ тер’’ тарабцохо’’, Ямалхана илени’’ ила’ нямна ӈэда лаханакон’ сырӈаваць. Яляна’’ ханзер’’ хэвам’ ниваць хамэда’’.
Анна Яптик’ падвы
Сидяӈг’’: А. Яптик’, Р.Окотэтто' тадтавы’’
