Няръяна Ӈэрм
«Юнармия» тер’’ нерняри’ миӈа’’
Ямал’ тиӈгэвна ӈацекына’’ тохолковандо’ хавна хуркари’’ серка’’на мэсеты’’. Пудана по’’ ямбан’ «Юнармия»хана сава теневабцудо’ ӈадимдемби’’.
Тандая’ тохолкова подо’ пэй’’. Салехардахана илена’’ ӈацекы’’ вэно маниена ненэцие нядабавы’’. Хор’’ иры’ тетимдей яля’ вэно’’ ӈаврад ма’’лавы’’. Школахандо’ Конев Анатолий мядоманзь товы. Нянанда вэнода тэвравы. Пыда Горнокнязевскхана иле, вэнода таняна лэтамбида. Ервсипой хаёвы хани вэнеко ӈобт’ ма’’лавы, вадавыда. Тикыда ханакохона ненэцие ӈэдалёлтамба подерпида. Тэри пихид ня’’амвы вэнеком’ тамна тохола тара. Минрена манзаямда Анатолий ӈацекэхэ’’ ваде’’мэда:
— Тохолавы вэнеко ни сятора’’, ненэцие ни пилюс’’, ерванда мунд’ инзеле. Вэнекомд сямбат, хусувэй вадамд теневаӈгу. Нянани Пуром’, Борейм’, Бурлунм’ тэврадамзь, пыдо’ няд’’мадани тара’’. Тандая’ тохоламбада вэнони поӈгандо’ подерпасетыдм’. Тарем’ ӈули’’ мер’ тохосеты’’.
Ӈацекы’’ вадавна, сыранда ха’’амва’ сер’ Горнокнязевскан’ хэванзь таславэдо’, таняна манэ’’мы вэнодо’ подеркая’’, ӈэдалёрта’’.
Ӈани ӈопой юнм’ ня’’амнандо’ намдаваць. «Юнармия»’ тер’’ помнандо’ пирдырмы’’. Харад’ хэвнякуна, пэдара’ поӈгана ту нихид енерць, сюрберць теневабцудо’ хорпавы’’.
Дарья Грибова ю’’ пода, ӈарка не нянда е’’эйӈэ сянаковы. Ёльце варемда мэ’’мы. Ту нимда ихид мерець ма’’лавэда, енерпата ӈобтикы ва’’лёй ӈэвы. «Ӈопой пирдырмахана ӈопой нява’’ ӈудина’’ нина’’ минребна’’ тарась. Мань поӈганандо’ сямянхат сибёцякодамзь. Ӈадьбято’ си’’ми тэраць, тарем’ мер’’ таславы я’ ёльцянд’ тэвываць. Тодо команда’ поӈгад маня’’ мереӈаваць».
Тарця сава серка’’на ӈацекы’’ харто’ ямдо’ лэтамбадаӈэ, харвабтанаӈэ вадёдана’’.
Г. Окотэтто’ падвы
Сидяӈг: Е. Грибова’ тавы’’
Авторы
Няръяна Нгэрм
Темы