Няръяна Ӈэрм
Каԓясамэхана ныптакуш’’
Чики дяԓямтоӈ пуӈ ченят ӈэтаӈатоньш. Каԓясамэхана няматаԓакуԓяш, поӈкнатуӈ шана’ко мянаԓяш’’. Няматаԓакуԓма дяԓяхана ныптакомантуӈ мэты ӈука неша’’ ӈомаш’’.
Хомана мянаԓмантуӈ мэты нешаӈи’’ няматаԓакуԓма дяԓян неԓьшут ӈанаташтут. Касама’’ тытуӈ дянямташту’’, кан’нан тытуӈ тохоԓашту’’. Неӈи’’ деты мэкат паныдю’’, пеми’’ хайташту’’.
Чуки похона Каԓясамэхана няхаԓдю’’ тыӈ кан’хана’’ ӈайтаԓё няматаԓакуԓяш’’. Тытоӈ шехеԓыӈ кысумна хомана минаш няматаӈа’’. Таньше нюӈкмана ӈайтаԓёш неша’’ тамна нючаӈc тохошту’’. Таԓям пу’’ тахана хомана тыӈ кан’хана мянаԓьшту’’. Эдуард Вэлло няматаԓакуԓьш мэ’эвчета тыта’’ неԓьшут кан’нан тохоԓампё дянямтампюмайта. Тcмкта шича пуӈ видян тохоԓампюмайта. Пы’та маньшту, нешиӈ неԓьшут хомана ӈанатанай, чикехена няматакуԓма дяԓяхана миннаш ӈайтаԓёты.
Чуки похона нюӈкмана мянаԓта’’ неша’’ ӈу’каш. Тыӈ канхана ӈайтаԓёмантуӈ камна Каԓясамыӈ чеԓ’’ неша’’ нэхэмтуӈ конуԓпёш поӈкнатуӈ нешади’’ спортхана мянаԓяш’’. Праздникан томы’’ хомана ныптакомаӈ мэты «Романтик» нимита клубхана мансԓанна’’ вильта концерт’ ӈычимчеӈаш’’, деты конкурс’ «Игрушка моего детства» шеԓтаӈаш’’, выставкам’ «Северное сияние» ӈомтаӈаш’’. Ненэй мяту’’ меӈаш’’, мятутуӈ та’амна ӈамԓу’’ пиԓимай’’, мячинчетуӈ куԓкаԓи’’ ӈамсадята’’ ӈамԓыхина’’ мячиӈаш’’.
Каԓясамэхана диԓина’’ неша’’ маньшту, няматаԓакуԓма дяԓя нянантоӈ пиԓи хома праздник’. Ныптакошту’’, нетуӈ манэшту’’, поӈкнатуӈ мянаԓьш шана’кошту’’. Касами’’ нэхэмтуӈ конуԓпёш мянаԓтан, неӈи’’ демьпчаԓутуӈ ӈычимчимпиш’’. Куԓкаԓи’’ мэкатай’’, патмы’’ паныдю’’, пеми’’ хcтмай’’. Няматаԓакуԓма дяԓям Каԓясамыӈ чеԓ’’ неша’’ хома шоньшахана мэ’ӈатоньш, праздникан томы’’ хомана ныптакуш’’. Няматаԓакуԓьш ӈайвахай местам канамы’’, поӈкнатуӈ шана’кош мянаԓьш нэхэԓмы’’ — тотуӈ мячисы’’ ня’амӈаш’’.
Автор: Андрей Пяк патмы
Авторы
Няръяна Нгэрм
Темы