Няръяна Ӈэрм
Камчаткаʼ тер мядоманзь тута
Юкад вата матˮ яляʼ хэˮмяхад Саляӈгардахана «Российский Север» форум пэӈгуˮ. Россиянаˮ картамʼ нэбˮ, хусувэй яхад ӈопойхав тона хибяри таняӈгу. Ӈулиˮ яʼ вэкад, сидя ӈарка ямгʼ поӈгад, Камчаткаʼ няд ӈаниʼ тутаˮ. Таняд ӈатенаваˮ — Карина Козуб. Яʼ маланʼ тованда нерцюˮ няданда хонаркудамзь.
Пыда таминда харта вадавнанда лахана пэяць, тарця вади хэтась:
— Г’амто, тумгытудю! «Торова, сава нини!» Гыммо Амыннон’ав’. Нюми Амыннон’ав’, чукчаˮ вадахад луцаʼ вадавна хэтабˮ, нюми таремʼ хэтыбада «Где она женщина?» Луца нюми Карина Козуб. Камчаткахана мань нюртеˮэйӈэ чукчаˮ, корякˮ, ительменˮ, эвенˮ, алеутˮ илаʼ нямна лахана пэйваць. Ханзерˮ илеваˮ, илнаˮ саирˮ хурка, ӈамгэʼ тоˮолха вадамʼ мэˮӈаваˮ малˮ ненэцяӈгˮ вадецетын.
Форуманʼ 2015 похона ӈэдалёрӈадамзь. «Российский Север» тамальӈгана ӈадимясь. Нюртей поʼ илебейˮ ненэциенаˮ Москва хардахана маˮлыць. Таняʼ «Коритэв» ансамбльʼ терˮ поӈгана ханˮӈадамзь. Тикы поми ӈобˮ ихинани ӈа. Тарабцонаˮ, сёнаˮ ёльце савуˮядонзь. Хусувэй хибя Камчаткаʼ, янаˮ терˮ нямна намдась. Россияхана иленаˮ тодо тэнзˮ ненэциеˮ няʼ Красной Площадянʼ ядэрӈаваць. Ӈокаˮ поˮ хэбˮнандоʼ ӈодˮ, тамальӈгыˮ няˮмыˮ нини тамна сававна тенеян. Тенадʼ нинаˮ яʼ ханярина манэпинаˮ, етриʼ нятаваˮ.
Тюку поʼ яхадани ӈопойӈэ тутадмʼ. «Стань лидером Российского Севера» тохолковамʼ тэрадамзь. Яʼ маланʼ товарими ӈатедмʼ. Ӈахатахаданда сямбирувна яӈгамамда манэˮманʼ харвадмʼ. Ненэся едэйˮ ӈамгэхэˮ сиднаˮ тохола енадмʼ. Харˮн минрена проектани ӈадимдеӈгудмʼ, тараӈгудмʼ, сё мэтадмʼ. Сидндет поʼ ямбанʼ тохолавэми, намдвэми ӈока. Теневабцони вадеˮманʼ харвадмʼ. Ӈани ялянда ӈэсондʼ лакамбойʼ!
Ти, янаˮ вэкад тарця юнета, яʼ ханяримна ӈэдалёрмамʼ мэнена не тута. Ехэрана яхад ӈэда няндаˮ няндермʼ намдаидаˮ.
Анна Яптикʼ падвы
Сидяӈг: К.Козубʼ тавы
Авторы
Няръяна Нгэрм
Темы